कोल्हापूर : कसबा बावडा मेन रोडवरील बेडेकर प्लाझामध्ये वकिलाच्या फ्लॅटमध्ये घरफोडीचा प्रकार घडल्याने खळबळ उडाली आहे. चोरट्याने बंद फ्लॅटचा कडीकोयंडा उचकटून ३१ हजारांच्या रोकडसह सोन्याचे दागिने असे सुमारे १ लाख ३१ हजारांचा ऐवज चोरुन नेला. ही घटना सोमवारी दुपारी दोन ते अडीच वाजण्याच्या सुमारास घडली.पोलिसांनी दिलेली माहिती अशी की, अमर ऊर्फ जयसिंह पांडुरंग नाईक (मूळ रा. बिरंजे पाणंद, कदमवाडी रोड, कसबा बावडा) हे वकील असून कसबा बावड्यात बेडेकर प्लाझामध्ये फ्लॅट आहे. सोमवारी दुपारी ते कामानिमित्त न्यायालयात गेले असता दुपारी दोन वाजण्याच्या सुमारास अज्ञात चोरट्याने त्यांच्या बंद फ्लॅटचा कडीकोयंडा उचकटून आत प्रवेश केला.
कपाटातील रोख ३१ हजार रुपये व दीड तोळ्याचे सोन्याचे मणिमंगळसूत्र, अर्धा-अर्धा तोळ्याच्या दोन अंगठ्या असा सुमारे १ लाख ३१ हजारांचा ऐवज लंपास केला. ॲड. नाईक फ्लॅटमध्ये आल्यानंतर हा घरफोडीचा प्रकार उघडकीस आला. याबाबत रात्री उशिरा शाहूपुरी पोलीस ठाण्यात गुन्हा नोंदविण्याचे काम सुरू होते.