नरकेंचे कट्टर समर्थक किशोर पाटील यांना उमेदवारी मिळणार?

कोपार्डे : करवीर तालुक्यातून शाहू आघाडीकडे इच्छुकांची मोठी गर्दी झाल्याने मागील निवडणुकीत लढत देणारे सतेज पाटील यांचे विश्वासू, तर माजी आ. चंद्रदीप नरके यांचे कट्टर समर्थक कुंभी-कासारी कारखान्याचे संचालक किशोर पाटील यांना उमेदवारी मिळणार का, याबाबत उलटसुलट चर्चा सुरू झाली आहे.

मागील निवडणुकीत किशोर पाटील यांना सतेज पाटील यांनी उमेदवारी दिली होती. त्यावेळी किशोर पाटील यांचा निसटता पराभव झाला होता. त्यानंतर ‘गोकुळ’संदर्भात गेल्या पाच वर्षांत घडलेल्या राजकीय व ‘गोकुळ’च्या लढतीत किशोर पाटील यांनी सतेज पाटील यांना साथ देत पडद्यामागे राहून सूत्रे हलवली होती. गेल्या निवडणुकीत निसटत्या मतांनी किशोर पाटील यांचा पराभव झाला होता. या पराभवाला कारणीभूत असणारे सर्व बारकावे हेरून ते दूर करण्यासाठी तयारी सुरू केली होती. ‘गोकुळ’ची निवडणूक जाहीर होताच किशोर पाटील यांनी जिल्ह्यातील दूध संस्था ठराव धारकांच्या गाठीभेटी घेऊन तयारी सुरू केली होती.

दरम्यान, ‘गोकुळ’च्या निवडणुकीचे नगारे वाजू लागले आणि सत्ताधारी गटातून फुटीचे हादरे बसू लागले. सत्ताधारी गटातील मातब्बरांनी विरोधी गटात प्रवेश केल्याने इच्छुकांची मोठी गर्दी झाली आहे. यात खुद्द किशोर पाटील यांच्या शिरोली गावचे ‘गोकुळ’चे माजी अध्यक्ष विश्वास पाटील यांनी प्रवेश केल्याने नेत्यांच्या पुढे उमेदवारी देताना त्यात धर्मसंकट निर्माण झाले आहे. कुंभी कारखान्याचे गेली १५ वर्षे संचालक उपाध्यक्ष अशी किशोर पाटील यांची कारकीर्द असल्याने सहकारात मोठा कार्यकर्त्यांचा गोतावळा आहे. याचबरोबर सतेज पाटील यांचे विश्वासू व चंद्रदीप नरके यांचे कट्टर समर्थक असल्याने किशोर पाटील यांना उमेदवारी मिळणार का, याकडे लक्ष लागले आहे.