इचलकरंजीत मोर्चेबांधणीस वेग

उत्सुकता शिगेला : पक्षश्रेष्ठींना साकडे

इचलकरंजी : नगरपालिकेकडील विविध विषय समित्यांची निवडणूक अवघ्या दोन दिवसांवर असल्याने पाणीपुरवठा व सार्वजनिक बांधकाम या दोन समित्यांकडील सभापतिपदी वर्णी लागण्याबद्दल मोठी उत्सुकता आहे. पालिकेत सत्तेत असलेल्या राष्ट्रीय कॉँग्रेसकडे पाणीपुरवठा, तर राष्ट्रवादी कॉँग्रेसकडे सार्वजनिक बांधकाम समिती असल्याने दोन्ही पक्षांच्या पक्षश्रेष्ठींकडे इच्छुक नगरसेवकांनी साकडे घातले आहे.नगरपालिकेमध्ये पक्षीय बलाबलप्रमाणे राष्ट्रीय कॉँग्रेसचे २९, राष्ट्रवादी कॉँग्रेसचे ११ व शहर विकास आघाडीचे १७ नगरसेवक आहेत. त्यापैकी राष्ट्रीय कॉँग्रेसकडे पाणीपुरवठा, आरोग्य आणि महिला व बालकल्याण या तीन समित्या आहेत. राष्ट्रवादी काँग्रेसच्या सार्वजनिक बांधकाम व शिक्षण अशा दोन समित्या वाट्याला आल्या आहेत. राष्ट्रवादी कॉँग्रेसकडे जांभळे गटाचे वर्चस्व आहे. परिणामी भाऊसाहेब आवळे व लतीफ गैबान यांनी बांधकाम समितीचे सभापतिपद मागितले असले तरी त्याबाबतचा निर्णय रविवारी (२१ डिसेंबर) राष्ट्रवादी कॉँग्रेसच्या होणाऱ्या नगरसेवकांच्या बैठकीत होईल, अशी माहिती माजी आमदार अशोकराव जांभळे यांनी दिली.राष्ट्रीय कॉँग्रेसमधील दिलीप झोळ व रवी रजपुते या दोघांचीही इच्छा पाणीपुरवठा समितीचे सभापतिपद मिळावे, अशी आहे. दोघेही तोलामोलाचे नगरसेवक असल्याने दोघांपैकी एकाची निवड करण्याची कसोटी पक्षश्रेष्ठींसमोर आहे. मात्र, दोघांनाही एकत्रित बसवून पहिल्यांदा सभापतिपद कोणाला हवे, याचा निर्णय त्यांनी करावा, असा तोडगा पक्षश्रेष्ठींकडून सुचविण्यात येणार असल्याची चर्चा आहे. याशिवाय आरोग्य समितीसाठी मिना बेडगे, भक्ती बोंगार्डे आणि सुजाता बोंगाळे यांच्यात चुरस असली तरी जास्तीत जास्त वेळ देणाऱ्या नगरसेविका म्हणून बेडगे यांचे नाव पुढे येत आहे. याशिवाय दरवर्षीप्रमाणेच शिक्षण आणि महिला व बालकल्याण या समित्या काहीशा दुय्यम दर्जाच्या मानण्यात येत असल्याने या समित्यांच्या सभापतिपदाची माळ कुणाच्या गळ्यात पडते, याचीही उत्सुकता आहे. (प्रतिनिधी)