कोल्हापूर जिल्ह्यामध्ये कार्यरत असणाऱ्या २७७५ आशा आणि १४० गटप्रवर्तक महिलांना १ मे २०२० पासून कोरोना महामारीच्या काळातील साडेतीन कोटी रुपयांचा प्रोत्साहन भत्ता देणे थकीत आहे. हा भत्ता तातडीने द्यावा, अशी मागणी महाराष्ट्र आशा वर्कर्स, गटप्रवर्तक व आरोग्य कर्मचारी संघटनेच्या वतीने प्रभारी मुख्य कार्यकारी अधिकारी अजयकुमार माने यांच्याकडे करण्यात आली. याबाबतची तरतूद पाहून निर्णय घेऊ, असे आश्वासन माने यांनी दिले.
आरोग्य विभागाकडून ३१ मार्च २०२० रोजी कोविड काळात काम करणाऱ्या आशा, गटप्रवर्तक महिला व इतर आरोग्य कर्मचाऱ्यांना सर्व ग्रामपंचायतींनी दरमहा एक हजार रुपये प्रोत्साहन भत्ता द्यावा, असा आदेश काढण्यात आला होता. याबाबत अन्य जिल्हा परिषदांनी आदेश काढून असा भत्ता देण्याच्या सूचना दिल्या; परंतु कोल्हापूर जिल्हा परिषद मुख्य कार्यकारी अधिकारी यांनी तारीख पाच जून २०२० रोजीच्या एका आदेशानुसार या आदेशाची अंमलबजावणी करून नये, असे पत्र दिले. त्यामुळे केवळ एक महिन्याचाच भत्ता मिळाला असून उर्वरित साडेतीन कोटी रुपयांचा भत्ता थकीत आहे. कुष्ठरोग शोधमोहिमेमध्ये आशा व गटप्रवर्तक महिलांनी काम करूनही त्याचा मोबदला अद्याप मिळालेला नाही. तसेच माझे कुटुंब माझी जबाबदारी या कामाचा मोबदला देत असताना पन्नास कुटुंबांना भेट दिली असेल तरच दीडशे रुपये दिले आहेत त्यामध्ये ही केलेल्या कामाइतका मोबदला दिलेला नाही. यासह अन्य मागण्यांची पूर्तता झाली नाही तर तीव्र आंदोलनाचा इशारा देण्यात आला.
शिष्टमंडळामध्ये संघटनेचे अध्यक्ष कॉ. शंकर पुजारी, पूजा लाड, राणी लाड, वनिता खोडके, नीता बेले, अंजली पडियार, अरुणा कांबळे, कॉ. विजय बचाटे, रूपाली पाटील, सरिता लाड, संगीता लाड यांचा समावेश होता.