गगनबावडा, चंदगड, आजऱ्यात अतिवृष्टी

लाेकमत न्यूज नेटवर्क

कोल्हापूर : कोल्हापूर जिल्ह्यात बुधवारी जोरदार पाऊस झाला. गगनबावडा, चंदगड व आजऱ्यात अतिवृष्टी झाली. सर्वाधिक पाऊस ९६.४ मिलिमीटर गगनबावडा तालुक्यात झाला आहे. धरणक्षेत्रातही जोरदार पाऊस कोसळत असून नद्यांच्या पाणीपातळीत झपाट्याने वाढ होत आहे. पंचगंगा नदीच्या पातळीत दिवसभरात दोन फुटाने वाढ झाली.

मंगळवारी सायंकाळपासून कोल्हापूर जिल्ह्यात पावसाने काहीसा जोर धरला. रात्रभर पावसाची रिपरिप राहिली. मात्र, बुधवारी पहाटेपासून पावसाचा जोर वाढत गेला. सकाळी तर गगनबावडा, चंदगड, आजरा, भुदरगड, शाहूवाडी, पन्हाळा तालुक्यांत धुवाधार पाऊस झाला. इतर तालुक्यातही जोरदार सरी कोसळत राहिल्या. कोल्हापूर शहरातही सकाळी साडेअकरा वाजेपर्यंत पावसाचा जोर राहिला. त्यानंतर काहीकाळ पावसाने उघडीप दिली. दुपारनंतर पुन्हा जोरदार सरी कोसळण्यास सुुरुवात झाली. जिल्ह्यातही दिवसभर जोरदार पाऊस सुरू राहिल्याने नदी, ओढ्यांना पाणी वाढले आहे. धरणक्षेत्रातही जोरदार पाऊस सुरू आहे. राधानगरी, तुळशी, दूधगंगा, कासारी, कुंभी, पाटगाव, चित्री धरणक्षेत्रात अतिवृष्टी झाली. नद्यांच्या पाणीपातळीत झपाट्याने वाढ होत असून, बुधवारी पंचगंगेची पातळी १५ फुटांपर्यंत पोहचली होती. विशेष म्हणजे बुधवारी दिवसभरात पंचगंगा नदीच्या पातळीत दोन फुटाने वाढ झाली. पंचगंगा नदीपात्राच्या काठावरील मंदिरे सायंकाळी पाण्याखाली गेली.

तालुकानिहाय झालेला पाऊस मिलिमीटरमध्ये असा-

हातकणंगले (२०.४), शिरोळ (२५), पन्हाळा (२४.२), शाहूवाडी (१६.६), राधानगरी (४१.४), गगनबावडा (९६.४), करवीर (२८.४), कागल (४७.५), गडहिंग्लज (६०.५), भुदरगड (४४.८), आजरा (७३), चंदगड (६८).

आजऱ्यात जनावरांच्या गोठ्याची पडझड

मलिग्रे (ता. आजरा) येथील कृष्णा भैरू बुगडे यांच्या जनावराच्या गोठ्याची पडझड झाली. यामध्ये चार हजारांचे नुकसान झाल्याची माहिती जिल्हा प्रशासनाने दिली.

‘घटप्रभा’ धरण भरले

चंदगड तालुक्यातील घटप्रभा धरण मंगळवारी मध्यरात्री दोन वाजता पूर्ण क्षमतेने भरले. धरणात पाणीसाठा गतवर्षीपेक्षा अधिक होता. त्यात गेली दोन दिवस जोरदार पाऊस कोसळत आहे. मंगळवारी ११३ मिलीमीटर पाऊस झाला. या धरणाची क्षमता १.५४५ टीएमसी आहे.