उद्योजक अमर डोंगरे बेपत्ता

महापूर, कोरोना, तेजी-मंदी व सूत दरवाढ या पार्श्वभूमीवर येथील वस्त्रोद्योग सतत अडचणीत सापडत आहे. त्यामुळे कारखाने बंद ठेवणे व आत्महत्येच्या घटना वाढत आहेत. अनेकांनी या परिस्थितीतून मार्ग काढून उभा राहण्याचा प्रयत्न केला, तर अनेकजणांनी या अडचणीतून स्वत:ला संपवून घेतले. शहरामध्ये कोरोनाच्या प्रादुभार्वामुळे लॉकडाऊन व अनलॉक यामध्ये कारखाने बंद ठेवण्यात आले. अनलॉकनंतर सुरू झालेल्या कारखान्याला कामगार पुरवठा न झाल्याने पुन्हा कारखाने बंद ठेवण्यात आले. यातच तेजी-मंदी व सध्या सूत दरवाढीसंदर्भात आंदोलने सुरू आहेत.

दरम्यान, उद्योजक अमर डोंगरे हे सोमवारी सकाळी मोटारसायकल (एमएच ०९ डीएल ८९१९) वरून घरातून बाहेर पडले होते. दुपारपर्यंत ते घरी न परतल्याने नातेवाइकांनी त्यांच्याशी दूरध्वनीवरून संपर्क साधला. मात्र, संपर्क होऊ न शकल्याने त्यांचा शोध घेण्याचे काम सुरू झाले. नातेवाइक, मित्र व पोलिसांनी शोधाशोध केली असता त्यांची मोटारसायकल पंचगंगा नदीघाटावर गणपती मंदिरजवळ आढळली. डोंगरे हे अचानक बेपत्ता झाल्याने शहरात उलटसुलट चर्चा सुरू आहे.