एसटी बस चालविणं दुचाकीएवढंच सोपं

प्रसन्ना पवार : ड्रायव्हिंगकडे आवड म्हणून पहावे. महिलांमध्ये जनजागृती करण्यासाठी ‘लोकमत’ने पुढाकार घेतला आहे.

सातारा : ‘एसटी बससारखे मोठे वाहन आपणाला चालवायला जमेल का? हा महिलांमध्ये न्यूनगंड असतो, पण एकदा का आपण वाहन चालविण्याकडे आवड म्हणून पाहिलं तर दुचाकी चालविण्याएवढंच बस चालविणं सोपं आहे,’ असा विश्वास उपप्रादेशिक परिवहन कार्यालयातील सहायक मोटार वाहन निरीक्षक प्रसन्ना पवार यांनी दिला आहे.मंगळावर पाऊल ठेवलेली सावित्रीची लेक मात्र एसटीचे स्टेअरिंग हाती घ्यायचं म्हटलं की ‘नको ग बाईऽऽऽ’ म्हणते. महामंडळानेही महिलांसाठी चालक भरतीत २,२५३ जागा राखीव ठेवल्या आहेत. या पार्श्वभूमीवर महिलांमध्ये जनजागृती करण्यासाठी निर्माण झालेल्या संधीचं सोनं करण्यासाठी ‘लोकमत’ने पुढाकार घेतला आहे. या पार्श्वभूमीवर सातारा उपप्रादेशिक परिवहन कार्यालयातील सहायक मोटार वाहन निरीक्षक प्रसन्ना पवार ‘लोकमत’शी बोलत होत्या. मोटारसायकलपासून ते ट्रकपर्यंत सर्वप्रकारची वाहने त्या सफाईदारपणे चालवितात. हे वाहन चालविताना येत असलेले अनुभवही त्यांनी ‘लोकमत’शी शेअर केले. पवार म्हणाल्या, ‘सायकल येत असलेल्या प्रत्येक मुलीला मोटारसायकल चालवायला आलं पाहिजे असं वाटत असते. अन् त्या काही दिवसांतच सफाईदारपणे चालवितात. अवजड वाहनांचंही तसंच आहे. अवजड वाहन चालविण्यासाठी हलके वाहन चालविण्याचा परवाना आवश्यक आहे. कारसारखे वाहन चालवत असलेल्या कोणत्याही स्त्रीला एसटी बस म्हणजे किरकोळ वाहन वाटायला लागते.’एसटी चालविण्याचा परवाना लगेच मिळत नाही, त्यासाठी चारचाकी वाहन चालविण्याचा परवाना काढणे बंधनकारक आहे. त्यानंतर अवजड वाहन चालविण्याचा परवाना मिळतो. महिलांना मुळात भीती असते ती गाडीच्या लांबीची. ती भीती संपली की झालं. त्यासाठी मनानं भक्कम असणं आवश्यक आहे,’ असेही पवार म्हणाल्या. (प्रतिनिधी)