कागल :
चंद्रकांत पाटील हे कोणावरही धमकीच्या आणि तंबीच्या भाषेत टीका करीत आहेत. छगन भुजबळ जामिनावर सुटलेले आहात, अशी भाषा बोलले होते. अशोक चव्हाणांची औकात काढली. आता अजित पवारांवर बोलत आहेत. त्यांच्यावर एक व्यंगचित्र छापून आले आहेत. झोपेत पलंगावरून खाली पडले तरी सरकार पडले, सरकार पडले, असे ते ओरडत आहेत. एकूणच त्यांना मस्ती आली आहे, अशी टीका ग्रामविकास मंत्री हसन मुश्रीफ यांनी रविवारी केली. कागल येथे पत्रकारांशी ते बोलत होते.
मंत्री मुश्रीफ म्हणाले, खासदार संजय राऊत यांनी नेहरू आणि गांधी या पंतप्रधानांची कारकीर्द आतापेक्षा चांगली होती, असे म्हटल्याने, तसेच मुख्यमंत्री उद्धव ठाकरे यांचे काम लोकांना पसंद पडल्याचे दाखविले गेल्याने चंद्रकांतदादांचा तोल सुटत आहे. कोरोनाच्या पार्श्वभूमीवर आरोग्याशी संबंधित साहित्य खरेदीवर जीएसटी माफ करावी, अशी मागणी अजित पवार यांनी केली होती. त्यामुळे देशाच्या अर्थमंत्री निर्मला सीतारामन यांनी राज्यांचे सर्व अर्थमंत्री सदस्य असणारी एक समिती नेमली. मात्र, त्याचे अध्यक्षपद मेघालयसारख्या छोट्या राज्याच्या अर्थमंत्र्यांकडे दिले. वास्तविक ते अजितदादांना द्यायला हवे होते. कारण जीएसटी सर्वाधिक देणारे महाराष्ट्र राज्य आहे. राज्यात कोरोनाचेही संकट मोठे आहे.
चौकट
● केंदांकडून महाराष्ट्राचे खच्चीकरण
मंत्री मुश्रीफ म्हणाले की, पंतप्रधान मोदींप्रमाणे निर्मला सीतारामनही महाराष्ट्राचा अपमान करीत आहेत. पंतप्रधानांनी चक्रीवादळाबद्दल गुजरातला एक हजार कोटींची नुकसानभरपाई जाहीर केली. पश्चिम बंगाल, ओडिशालाही नुकसानभरपाई जाहीर केली, पण महाराष्ट्राला यातून वगळले. संधी मिळेल तिथे ही मंडळी महाराष्ट्राचा अपमान करीत आहेत.
● खाकीतील दरोडेखोर..
परिवहन मंत्री अनिल परब यांच्यावर आरोप करणारा गजेंद्र पाटील म्हणजे दुसरा परमबीर सिंगच आहे. केवळ आरोपामुळे अनिल देशमुख यांच्यासारख्या चांगल्या गृहमंत्र्याला राजीनामा द्यावा लागला. खाकीतील हे दरोडेखोर हजारो कोटींची उलाढाल करतात. हे आधी गजाआड झाले पाहिजेत. ते लवकरच होतील, असा सूचक इशारा मंत्री मुश्रीफ यांनी दिला.