जयसिंगपुरात येणाऱ्या प्रमुख मार्गावर कॅमेऱ्याची नजर

संदीप बावचे

जयसिंगपूर : कोणताही गुन्हा घडल्यानंतर पुरावे गोळा करण्यासाठी आणि आरोपींना गजाआड करण्यासाठी सीसीटीव्हीची मोठी मदत होत असते. शहराचा विस्तार पाहता गुन्हेगारांवर वॉच ठेवण्याबरोबर गुन्हेगारीला आळा बसावा या पार्श्वभूमीवर शहराला जोडल्या जाणाऱ्या प्रवेशद्वाराच्या ठिकाणी सीसीटीव्ही प्रकल्प जयसिंगपूर पोलिसांनी हाती घेतला आहे. यामध्ये लोकसहभाग देखील तितकाच महत्त्वाचा ठरणार आहे.

सेफ सिटीअंतर्गत जयसिंगपूर शहरात २१ लाख रुपये खर्चाचा सीसीटीव्ही प्रकल्प कार्यान्वित करण्यात आला होता. शहरातील व्यापारी, उद्योजक यासह विविध सामाजिक संस्थांना मदतीचे आवाहन केल्यानंतर अनेक दानशूरांनी मदतीचे हात पुढे केले होते. जयसिंगपूर नगरपालिकेने देखील पुढाकार घेतला होता. त्यामुळे शहराअंतर्गत महत्त्वाच्या ठिकाणी सीसीटीव्ही कॅमेरे बसविण्यात आले होते. शंभर टक्के शहर सीसीटीव्ही झाले नसले तरी उपलब्ध असणाऱ्या कॅमेऱ्यामुळे पोलिसांना मदत झाली होती. शहरातील चोरीच्या घटनांचा मार्ग काढण्यासाठी सीसीव्हीची मोठी मदत देखील पोलिसांना झाली होती. मात्र, यातील बहुतांशी कॅमेरे बंद पडल्यामुळे तपासकामात अडथळे निर्माण झाले आहेत. दरम्यान, शहरातील मुख्य चौक असणाऱ्या क्रांती चौकातील बंद कॅमेरे सुरू करण्यासाठी पोलिसांनी पुढाकार घेतला आहे. रेल्वेस्थानक या ठिकाणचे कॅमेरे सुरू करण्यात आले आहेत, तर उदगांव चेकनाक्यावर कॅमेरे कार्यान्वित करण्यात आले आहेत. याचा फायदा गुन्हेगारांवर वॉच ठेवण्यासाठी पोलिसांना होणार आहे. याशिवाय, शिरोळकडून येणाऱ्या मार्गाबरोबरच चौंडेश्वरी सूतगिरणी याठिकाणी सीसीटीव्ही कॅमेरे बसविण्यासाठी पोलिसांनी पुढाकार घेतला आहे.

लोकसहभाग महत्त्वाचा

शहराचा विस्तार पाहता सध्या अस्तित्वात असलेल्या सीसीटीव्हींची संख्या अपुरी आहे. शहरातील गुन्हेगारीला आळा बसावा म्हणून जयसिंगपूर पोलिसांनी पुढाकार घेतला असला तरी यामध्ये लोकसहभाग महत्त्वाचा ठरणार आहे, तरच जयसिंगपूर येणाऱ्या काळात सीसीटीव्हीयुक्त बनणार आहे.

कोट -

पहिल्या टप्प्यात जयसिंगपूर शहरात येणाऱ्या प्रमुख महत्त्वाच्या ठिकाणी सीसीटीव्ही कॅमेरे कार्यान्वित करण्यासाठी प्रकल्प हाती घेतला आहे. चोरीच्या घटना टाळण्यासाठी शहरवासीयांनी देखील दक्षता घेतली पाहिजे.

- राजेंद्र मस्के, पोलीस निरीक्षक.