लोकमत न्यूज नेटवर्क
साके : शेतकरी हा देशाचा मुख्य कणा आहे. भाजपने शेतकऱ्यांकडे दुर्लक्ष केले असून, ही गंभीर बाब आहे. त्यांनी सहानुभूती दाखवून शेतकऱ्यांशी चर्चा करावी अन्यथा शेतकऱ्यांच्या या आंदोलनाची वज्रमुठ येत्या काळात भाजपला सत्तेतून घालवल्याशिवाय राहणार नाही. शेतकऱ्यांचे आंदोलन मोडणाऱ्यांना शेतकरी आक्रोशाची किंमत मोजावी लागणार असल्याचा इशारा ग्रामविकास मंत्री हसन मुश्रीफ यांनी दिला. बाचणी ते वडशिवाले दरम्यान असणाऱ्या दूधगंगा नदीवरील नवीन पुलाच्या भूमिपूजनप्रसंगी ते बोलत होते. यावेळी अध्यक्षस्थानी कोल्हापूर दक्षिणचे आमदार ऋतुराज पाटील होते.
बाचणी दूधगंगा नदीवरील नवीन पुलाचे भूमिपूजन ग्रामविकास मंत्री हसन मुश्रीफ, आमदार ऋतुराज पाटील यांच्या हस्ते करण्यात आले. यावेळी जिल्हा परिषद सदस्य मनोज फराकटे, उपसभापती अंजना राजेंद्र सुतार आदी मान्यवर उपस्थित होते. मंत्री हसन मुश्रीफ, आमदार ऋतुराज पाटील यांचा यावेळी धरण सोसायटी, ग्रामपंचायतीमार्फत सत्कार करण्यात आला.
येत्या दीड वर्षात या पुलाचे उद्घाटन करू, असा विश्वास मुश्रीफ यांनी व्यक्त केला. स्वागत सरपंच इकबाल नाईकवडी यांनी केले तर प्रास्ताविक एम. एस. पाटील यांनी केले. यावेळी सूर्यकांत पाटील, डी. एस्. सोनवणे यांनी मनोगत व्यक्त केले. या कार्यक्रमाला बाळासाहेब तुरंबे, उपसरपंच गणपती पाटील, विलास साठे, एस. एस. माने, गणपती फराकटे, एकनाथ पाटील, सुभाष भोसले, सागर पाटील, सुयोग वाडकर, संजय नाईक आदी उपस्थित होते.
चैाकट ः ऋतुराज पाटलांना सहकार्य...
कागल आणि करवीर तालुक्यांना जोडणारा हा पूल असून, याच्या उभारणीबाबत मंत्री मुश्रीफ यांनी उत्कृष्ट नियोजन केले आहे. बाचणीची जिलेबी सर्वत्र प्रसिद्ध आहे. त्याचा धागा पकडत कागल आणि करवीरचे संबंध यापुढेही असेच गोड ठेवूया तसेच आगामी जिल्हा बॅंक, राजाराम कारखाना, गोकुळसह सर्वच निवडणुकीत विजय मिळवून सामान्य नागरिकांना न्याय मिळवून देऊया, असा निर्धार आमदार ऋतुराज पाटील यांनी व्यक्त केला.
फोटो ओळी ः बाचणी (ता. कागल) येथील नवीन पुलाचे भूमिपूजन ग्रामविकास मंत्री हसन मुश्रीफ, आमदार ऋतुराज पाटील यांच्या हस्ते करण्यात आले. यावेळी मनोज फराकटे, सूर्यकांत पाटील आदी उपस्थित होते.