शिरोळमधील लसीकरणाचा वेग वाढवा

जयसिंगपूर / शिरोळ / दानोळी : कोरोनाला हद्दपार करण्यासाठी लसीकरणाचा वेग वाढवा. जनजागृती करून जास्तीत जास्त लसीकरण करण्यासाठी सर्वांनीच प्रयत्न करावेत. ३० एप्रिलअखेर लसीकरण पूर्ण करावे. त्याकरिता लागणाऱ्या सर्व बाबींची पूर्तता करून घ्यावी. प्रसंगी खासगी डॉक्टरांचे सहकार्य घ्यावे, अशा सूचना जिल्हाधिकारी दौलत देसाई यांनी दिल्या.

शनिवारी देसाई हे शिरोळ तालुका दौऱ्यावर आले होते. यावेळी जयसिंगपूर येथे नगरपालिकेत लसीकरणाबाबत मार्गदर्शन केले.

अध्यक्षस्थानी तहसीलदार डॉ. अपर्णा मोरे होत्या. सकाळी जिल्हाधिकारी देसाई यांनी दानोळी प्राथमिक आरोग्य केंद्रापासून दौऱ्याला सुरुवात केली. त्यानंतर जयसिंगपूर येथे बोलताना जिल्हाधिकारी म्हणाले, शिरोळ तालुक्यामध्ये गेल्या आठ दिवसांपासून कोरोना रुग्णांची संख्या वाढत आहे. शहरातील व्यापारी, व्यावसायिक आणि नागरिकांनी मास्क, सॅनिटायझरचा वापर करावा. संचारबंदी आदेशाचे पालन करण्याच्या वेळोवेळी सूचना द्याव्यात. तसेच या नियमांचे उल्लंघन करणाऱ्यांवर कायदेशीर कारवाई करावी. बैठकीस नगराध्यक्षा डॉ. नीता माने, उपनगराध्यक्ष संजय पाटील-यड्रावकर, मुख्याधिकारी टीना गवळी, उपमुख्याधिकारी पवन म्हेत्रे, जि. प. समाजकल्याण सभापती स्वाती सासणे, तालुका वैद्यकीय अधिकारी डॉ. पी. एस. दातार, डॉ. पांडुरंग खटावकर उपस्थित होते. दानोळी येथे जि. प. सदस्या शुभांगी शिंदे, सरपंच सुनीता वाळकुंजे, उपसरपंच सुनील शिंदे उपस्थित होते. तर, शिरोळ येथे ग्रामीण रुग्णालयात सुरू असलेले लसीकरण, स्वॅब संकलन, निरीक्षण केंद्र याबाबत जिल्हाधिकाऱ्यांनी समाधान व्यक्त केले. यावेळी नगराध्यक्ष अमरसिंह पाटील, डॉ. महेंद्र कुंभोजकर उपस्थित होते. जिल्हाधिकाऱ्यांनी तालुक्यातील प्राथमिक आरोग्य केंद्रांना भेटी देऊन कोविड लसीकरणाची माहिती घेतली.

फोटो - ०३०४२०२१-जेएवाय-०१

फोटो ओळ - जयसिंगपूर येथे पालिका सभागृहात जिल्हाधिकारी दौलत देसाई यांनी लसीकरणाबाबत मार्गदर्शन केले. यावेळी मुख्याधिकारी टीना गवळी, जि. प. समाजकल्याण सभापती स्वाती सासणे, नगराध्यक्षा डॉ. नीता माने, तहसीलदार डॉ. अपर्णा मोरे उपस्थित होत्या.