Kalyan Crime: ऐन निवडणुकीच्या तोंडावर ठाणे जिल्ह्यात राजकीय वैमनस्यातून गुन्हेगारीने टोक गाठल्याचे चित्र आहे. मतदारांवर दबाव आणण्यासाठी आणि विरोधकांना संपवण्यासाठी थेट जीवघेणे हल्ले होत असल्याने जिल्ह्यात खळबळ उडाली आहे. अंबरनाथमध्ये भाजप उमेदवाराच्या भावावर प्रचार करू नको म्हणून धारदार शस्त्राने हल्ला करण्यात आल्याची घटना ताजी असतानाच कल्याण तालुक्यातील मुरबाड महामार्गाजवळ एका राजकीय पदाधिकाऱ्याची निर्घृण हत्या करण्यात आली.
कल्याण तालुक्यातील मुरबाड महामार्गावरील मामणोली गावाजवळ शुक्रवारी संध्याकाळी किरण घोरड या राजकीय पदाधिकाऱ्याची निर्घृण हत्या करण्यात आली. प्राथमिक माहितीनुसार, जुन्या वैमनस्यातून टोळक्याने राडा घालत घोरड यांच्यावर जीवघेणा हल्ला केला. वाद चिघळल्यानंतर धारदार शस्त्रांनी त्यांच्यावर वार करण्यात आले.गंभीर अवस्थेत त्यांना रुग्णालयात नेत असतानाच त्यांचा मृत्यू झाला. पोलिसांनी तत्काळ अतिरिक्त कुमक तैनात केली असून संशयितांचा शोध घेण्यासाठी सीसीटीव्ही फुटेज आणि कॉल रेकॉर्ड तपासले जात आहेत. या हत्येमागील नेमके कारण शोधण्याचे काम सुरू असून, घोरड यांच्या अलीकडील हालचाली आणि संपर्कातील व्यक्तींची कसून चौकशी केली जात आहे.
अंबरनाथमध्ये भाजप उमेदवाराच्या भावावर जीवघेणा हल्ला
मुरबाडच्या घटनेपूर्वी बुधवारी, अंबरनाथ पश्चिम भागात भाजप उमेदवाराच्या भावावर शिवसेनेच्या कार्यकर्त्यांकडून जीवघेणा हल्ला करण्यात आला. सत्यम सुनील तेलंगे (२२) असे जखमी तरुणाचे नाव आहे. त्याचा भाऊ प्रजेश तेलंगे हे भाजपच्या तिकिटावर नगरपालिकेच्या प्रभाग क्रमांक ५ मधून निवडणूक लढवत आहेत. हल्ल्यातील मुख्य आरोपी साहिल वडनेरे याने सत्यमला बोलावून भाजपाचा प्रचार करायचा नाही, केल्यास ठार मारेल, अशी धमकी दिली. यानंतर त्याने अचानक धारदार शस्त्राने सत्यमवर वार करून त्याला गंभीर जखमी केले.
याप्रकरणी साहिल वडनेरे आणि त्याच्या दोन अनोळखी साथीदारांवर अंबरनाथ पोलीस ठाण्यात गुन्हा दाखल झाला आहे. पोलिसांनी मुख्य आरोपी साहिल वडनेरेला अटक केली असून, त्याला गुरुवारी न्यायालयात हजर करण्यात येणार आहे.