बदलापूर : बदलापूरच्या माणकिवली एमआयडीसीत झालेल्या स्फोटात जखमी झालेल्या घनश्याम मेस्त्री यांचा मंगळवारी उपचारांदरम्यान मृत्यू झाला. त्यांच्यावर मुंबईच्या जेजे हॉस्पिटलमध्ये उपचार सुरू होते.
माणकिवली एमआयडीसीतील रेअर फार्मा या केमिकल कंपनीत सोमवारी पहाटे मोठा स्फोट झाला. या स्फोटाची भीषणता इतकी होती. रिऍक्टरचा एक १०० किलो वजनाचा एक तुकडा उडून तब्बल ४०० मीटर अंतरावरील खरवई परिसरातल्या चाळीवर जाऊन कोसळला. या चाळीत राहणाऱ्या मेस्त्री कुटुंबाच्या घराचा छताचा पत्रा फोडून गाढ झोपेत असलेल्या घनश्याम मेस्त्री यांच्या पायावर हा तुकडा कोसळला. यात त्यांचे दोन्ही पाय शरीरापासून वेगळे झाले. तर त्यांची मुलगी आणि पत्नी यांनाही दुखापत झाली. यानंतर गंभीर जखमी अवस्थेत घनश्याम यांना मुंबईच्या जेजे हॉस्पिटलमध्ये दाखल करण्यात आले. त्यांच्या पायावर रात्री शस्त्रक्रिया सुद्धा करण्यात आली. मात्र यानंतर उपचारांदरम्यान मंगळवारी त्यांचा मृत्यू झाला. अवघ्या ३५ वर्षांच्या घनश्याम मेस्त्री यांच्या मृत्यूमुळे मेस्त्री कुटुंबावर दुःखाचा डोंगर कोसळला आहे.
मेस्त्री कुटूंब मूळचे सिंधुदुर्ग जिल्ह्यातील सावंतवाडी जवळच्या इन्सुली गावचे असून या घटनेनंतर इन्सुली गावात शोककळा पसरली गेली अनेक वर्षे कामानिमित्त घनश्याम मेस्त्री हे बदलापूर येथे राहत होते.