बदलापूर : मालमत्तेच्या वादातून झालेके पती पत्नीचे भांडण सोडवण्यासाठी आलेल्या मेहुणीची भाऊजीने हत्या केल्याची घटना बदलापूरमध्ये आज घडली. यात आरोपीने पत्नी आणि सासूवरही हल्ला करत जखमी केले आहे. याप्रकरणी बदलापूर पश्चिम पोलिसांनी आरोपीला बेड्या ठोकल्या आहेत. बदलापूर गावातील सनसेट हाईट इमारतीत फरीदा सय्यद या त्यांच्या दोन मुली निलोफर आणि सनोबर, तसेच नातवंडांसोबत राहतात. त्यांची मुलगी नीलोफर ही विवाहित असून पतीसोबत वाद सुरू असल्याने ती आईकडेच वास्तव्याला आहे.
आज सकाळी ६ वाजताच्या सुमारास नीलोफरचा पती मोहम्मद आयुब शेख हा सासूच्या घरी राहणाऱ्या आपल्या पत्नीला भेटायला आला. मात्र दरवाजा उघडताच त्याने सोबत आणलेल्या धारदार शस्त्राने निलोफरवर हल्ला चढवला. या हल्ल्यात निलोफर ही गंभीर जखमी झाली, हे पाहून त्याची मेहुणी सनोबर आणि तिची आई फरीदा या दोघी निलोफरला वाचवायला मध्ये पडल्या. मात्र मोहम्मदने त्या दोघींवरही हल्ला चढवला. यामध्ये सनोबरचा जागीच मृत्यू झाला, तर फरीदा सय्यद जखमी झाल्या. यावेळी स्थानिकांनी मोहम्मद आयुब शेख याला पकडून पोलिसांच्या ताब्यात दिले. या हल्ल्यात जखमी झालेल्या निलोफर आणि फरीदा सय्यद यांच्यावर बदलापूरच्या खासगी रुग्णालयात उपचार सुरू आहेत. मोहम्मद शेख हा दुबईला कामाला होता. पत्नी नीलोफर सोबत त्याचे पटत नसल्यामुळे ते दोघेही वेगळे राहत होते. मात्र जोगेश्वरीच्या प्रॉपर्टीवरून या दोघांमध्ये वाद होते. याच वादातून ही हत्या झाल्याची माहिती बदलापूर पश्चिम पोलीस ठाण्याचे वरिष्ठ पोलीस निरीक्षक दत्ता गावडे यांनी दिली आहे. याप्रकरणी आरोपी मोहम्मद आयुब शेख याला पोलिसांनी अटक केली.