बेकार, आळशी आणि बेजबाबदार यांसारख्या शब्दांनी गौरविल्या गेलेल्या लोकांसाठी एक आनंदाची बातमी आहे. विचार करा की, तुम्हाला अशी एक नोकरी मिळेल जिथे तुम्हाला 'काही कामच करावं' लागू नये. महत्त्वाची बाब म्हणजे या बदल्यात तुम्हाला १.६२ लाख रूपये पगार सुद्धा मिळणार. तसेच वेगवेगळ्या सुट्टी आणि नोकरीशी संबंधित सर्व भत्ते व सुविधाही मिळतील. वाटते ना स्वप्नातील नोकरीसारखी नोकरी. पण तुम्ही म्हणाल अशी नोकरी कशी मिळणार?
इथे आहे ही नोकरी?
नवभारत टाइम्सने दिलेल्या वृत्तानुसार, स्वीडनमध्ये एक एक्सपरिमेंटल आर्ट प्रोजेक्ट सुरू आहे. हा प्रोजेक्ट सरकारकडू फंड केला जात आहे. गोथनबर्ग शहरात ही नोकरी आहे. आश्चर्याची बाब ही आहे की, यासाठी केवळ एकच लकी विनर निवडला जाणार आहे. नोकरी प्रमाणापेक्षा मजेदार आहे. कारण या नोकरीसाठी एका रेल्वे स्टेशनवर रहायचं आहे. सध्या या स्टेशनचं काम सुरू आहे. जर तुम्ही अजूनही याच विचारात असाल की, अशी कशी काहीच काम करता इतक्या पगाराची नोकरी मिळणार? तर त्याची पूर्ण माहिती खालीलप्रमाणे आम्ही सांगतो आहोत.
काय असेल काम?
या एका लकी विनरला दिवसभरात केवळ एकच काम करायचं आहे. या काम सुरू असलेल्या स्टेशनवर एक घड्याळ आहे. करायचं इतकंच आहे की, या घड्याळावरील एका बटनला दाबायचं आहे. याने स्टेशनवरील सर्व फ्लोरोसेंट बल्ब सुरू होतील. याचा अर्थ असा होतो की, तुम्ही(कमर्चारी) त्या दिवशी स्टेशनवर होते. एकंदर काय तर हे अटेंडससारखं काम आहे. बाकी यानंतर हा व्यक्ती दिवसभर काहीही करू शकतो. शिफ्ट संपल्यानंतर या व्यक्तीला पुन्हा एकदा घड्याळावरील बटनाला दाबायचं आहे. जेणेकरून बल्ब बंद होतील.
कधीही सोडू शकता नोकरी
आणखी एक मजेदार बाब म्हणजे बटन पंच केल्यावर ही व्यक्ती स्टेशनबाहेरही जाऊ शकते. दिवसभर काहीही करू शकते. इतकेच नाही तर ही व्यक्ती कधीही नोकरी सोडू शकतो. किंवा आपल्या जागी तो दुसऱ्या व्यक्तीलाही कामावर ठेवू शकतो. ही नोकरी आयुष्यभरासाठी मिळणार आहे. या बदल्यात व्यक्तीला महिन्याला २३२० डॉलर इतका पगार दिला जाणार आहे. त्यासोबतच पेंशन फंड, सुट्टी आणि दुसऱ्या सुविधाही मिळणार आहेत.
२०१७ मध्ये मागितल्या होत्या आयडिया
या ड्रिम जॉबची कल्पना २०१७ मध्ये मांडली गेली होती. स्वीडनच्या पब्लिक आर्ट एजन्सी आणि ट्रान्सपोर्ट अॅडमिनिस्ट्रेशनने एका स्पर्धेची सुरूवात केली. यात जगभरातील आर्टिस्टना आयडिया मागितल्या गेल्या. जेणेकरून चांगल्याप्रकारे गोथेनबर्ग स्टेशनला डिझाइन करता यावं. यासाठी ७५०, ००० डॉलरची रक्कम बक्षिस म्हणून ठरवली होती. अनेक आर्टिस्टने आयडिया पाठवल्या, पण सिमोन गोल्डिन आणि जॅकॉब सेनैबीने एक अनोखी आयडिया दिली. त्यांनी आयडिया दिली की, या पैशांमधून एक कर्मचारी ठेवला जावा आणि त्याला आयुष्यभर काहीही काम दिलं जाऊ नये.
होत आहे टिका
फाऊंडेशनच्या परीक्षकांना ही आयडिया फारच आवडली. नंतर याची घोषणाही करण्यात आली. पण स्वीडनच्या काही भागातून यावर टिकाही करण्यात आली. लोकांचं म्हणणं आहे की, टॅक्स भरणाऱ्या लोकांच्या पैशांची ही नासाडी आहे. राजकीय लोकांनीही यावर टिका केली. पण जर तुम्हाला ही नोकरी पसंत असेल तर तुम्हाला सांगतो की, हे स्टेशन २०२६ मध्ये सुरू झाल्यावर कर्मचाऱ्याची नियुक्ती केली जाईल. तशी या नोकरीची अधिक माहिती पुढील लिंकवरतुम्हाला बघता येईल.