भारतीय लग्नांमध्ये जेवणाला फार महत्व असतं. इतकंच काय तर जेवणावरून भारतात लग्नही मोडतात. अशीच एक घटना ओडिशामधून समोर आली आहे. सगळं काही ठीक सुरू होतं. मात्र, जेव्हा नवरदेवाकडील पाहुण्यांना समजलं की, लग्नात मटणाची व्यवस्था करण्यात आली नाही तर सगळेच नाराज झाले. जेव्हा नवरदेवाला हे समजलं तेव्हा तोही नाराज झाला आणि त्यानंतर तो चक्क मंडपातून गायब झाला.
टाइम्स नाउच्या एका रिपोर्टनुसार, ही घटना ओडिशातील जाजपूरमधील आहे. इथे मुलीकडच्या लोकांनी वरातीचं मोठ्या जल्लोषात स्वागत केलं. लग्नाचे रितीरिवाज सुरू होते. यादरम्यान पाहुण्यांना समजलं की, जेवणात मटण नाही तर सगळेच नाराज झाले. (हे पण वाचा : हेच होणार ना! आपल्याच लग्नात नवरदेवाने केलं असं काही, नवरीने थेट लग्न करण्यास दिला नकार)
पाहुण्यांचं म्हणणं होतं की, जेवणात मटणाची डिमांड आधीच केली गेली होती. जेव्हा २७ वर्षीय नवरदेव रमाकांत पात्राला हे समजलं की, मटण नाही तर प्रकरण आणखीन गंभीर झालं. नवरदेव सुद्धा पाहुण्यांप्रमाणे जेवणात मटण नसल्याने भडकला. मटणाचा वाद इतका पेटला की, नवरदेवाने थेट लग्न करण्यास नकार दिला
मुलीकडच्या लोकांनी पाहुण्यांना आणि नवरदेवाला खूप समजावण्याचा प्रयत्न केला. पण नवरदेवाने काही एक ऐकलं नाही. नवरदेव त्याच्या एका नातेवाईकासोबत त्याच्या गावाला गेला आणि त्याच्याच घरी थांबला. सांगितलं जात आहे की, नवरदेवाने त्याच रात्री एका दुसऱ्या मुलीसोबत लग्न केलं. पोलिसांनुसार याप्रकरणी आतापर्यंत कुणीही काहीही तक्रार केलेली नाही.