Bald Groom Viral Video: लग्नाचा सीझन अजूनही सुरूच आहे. त्यामुळे लग्नासंबंधी अनेक अजब घटना नेहमीच समोर येत असतात. अशीच एक धक्कादायक घटना बिहारमधून समोर आली आहे. इथे एका नवरदेवाचं टक्कल असल्याचं समजल्यावर नवरीकडील लोकांनी त्याला बेदम मारहाण केली.
बिहारच्या गया जिल्ह्यातील बजौरा गावातील ही घटना आहे. या घटनेचा एक व्हिडीओ सोशल मीडियावर व्हायरल झाला आहे. ज्यात नवरीकडील लोक नवरदेवासोबत मारहाण करताना आणि त्याला शिवीगाळ करताना दिसत आहेत. तर नवरदेव माफी मागताना दिसत आहे. पण नवरीकडील लोकांनी त्याच्यावर काही दया दाखवली नाही आणि त्याला मारहाण केली.
रिपोर्टनुसार, गयाच्या इकबालपुर भागात राहणाऱ्या नवरदेवाचं लग्न बजौरा गावातील तरूणीसोबत ठरलं होतं. हे नवरदेवाचं दुसरं लग्न होतं. तर नवरी आणि तिच्या परिवाराला नवरदेवाला टक्कल असल्याचं माहीत नव्हतं. लग्नाआधी याबाबत नवरदेवाने कुणालाही काही सांगितलं नव्हतं. लग्नाच्या दिवशी त्याने फेट्याशाकील विगचा वापर करून टक्कल लपवण्याचा प्रयत्न केला. त्याचा भांडाफोड झाल्यावर त्याची जी स्थिती झाली त्याचा त्याने विचारही केला नसेल.
नवरदेव आपली वरात घेऊन नवरीच्या घरी पोहोचला. त्यांचं सन्मानाने स्वागत करण्यात आलं. पण जेव्हा नवरीच्या परिवाराला समजलं की, नवरदेवाला टक्कल आहे तर परिवारातील लोक नाराज झाले. नवरीच्या परिवाराला त्याच्या केसांबाबत संशय आला. त्यांनी त्याचा फेटा खेचला तर विग हाती आला आणि टक्कल उघडं पडलं. कथितपणे पहिली पत्नी असूनही दुसरं लग्न करत असल्याचं समजल्यावर नवरीकडील लोक आणखीन संतापले आणि त्याला मारहाण केली.