गॅस डीलरशिपच्या नावाखाली साडेदहा लाखाला गंडविले

लोकमत न्यूज नेटवर्क

जळगाव : बनावट कागदपत्रे तयार करून उज्ज्वला गॅस एजन्सीची डीलरशिप देण्याच्या नावाखाली कालिदास विलास सूर्यवंशी (वय ३३, रा. दहिगाव, ता. यावल) या तरुणाला १० लाख ३३ हजार रुपयांचा ऑनलाइन गंडा घालणाऱ्या सुनीलकुमार सहानी ब्रह्मदेव ऊर्फ अनिलकुमार (वय ३८, रा. तेजपूर, बिहार) व कन्हैय्या कुमार सहानी राजेंदर सहानी (वय ४३, कोलकाता) या दोघांना सायबर पोलिसांनी पंजाबमधून अटक केली. शनिवारी न्यायालयाने त्यांना पोलीस कोठडी सुनावली.

पोलिसांनी दिलेल्या माहितीनुसार, १८ ते ३० डिसेंबर २०२० या कालावधीत आशितोष कुमार नाव सांगणाऱ्या व्यक्तीने कालिदास सूर्यवंशी यांना उज्ज्वला गॅस एजन्सीची डीलरशिप देतो असे सांगून खोटी कागदपत्रे तयार केली व ती एका वेबसाइटवर पाठवून वेगवेगळ्या कारणांसाठी ए. यू. स्मॉल फायनान्स लि. या बँकेचा यूपीआय आयडीद्वारे बारकोड स्कॅन करून वेळोवेळी १० लाख ३३ हजार रुपये ऑनलाइन स्वीकारले होते. या व्यवहारानंतर ना डीलरशिप मिळाली ना पैसे. आपली फसवणूक झाल्याचा प्रकार लक्षात आल्यानंतर सूर्यवंशी यांनी सायबर पोलीस ठाणे गाठून तक्रार दिली होती. त्यानुसार ६ जून २०२१ रोजी गुन्हा दाखल झाला होता.

दिल्ली, पंजाब, कोलकाता फिरले पथक

सायबर पोलीस ठाण्याचे निरीक्षक बळीराम हिरे व उपनिरीक्षक अंगद नेमाणे यांनी या गुन्ह्यांचे तांत्रिक विश्लेषण करून अनिलकुमार याचे नाव निष्पन्न केले. अधिकच्या चौकशीत कन्हैय्याचेही नाव पुढे आले. त्यामुळे हवालदार वसंत बेलदार, प्रवीण वाघ, श्रीकांत चव्हाण, ललित नारखेडे व भालेराव यांचे पथक दिल्लीला रवाना झाले. तेथून हे पथक कोलकाता व नंतर पंजाबमध्ये फिरले. पठाणकोट येथून या दोघांना ताब्यात घेऊन शनिवारी सकाळी जळगावात दाखल झाले.

सीबीआयने केली होती अटक

जळगाव पोलिसांनी ताब्यात घेण्याआधी या दोघांना दिल्ली सीबीआयने देखील फसवणूक व माहिती तंत्रज्ञान कायद्यान्वये अटक केली होती. त्यानंतर पंजाबमधील पठाणकोट तसेच झाशी पोलिसांनी देखील यांना अटक केली आहे. या गुन्ह्यात आणखी इतरांचाही सहभाग असून, पोलीस त्यांचा शोध घेत आहे. सुनीलकुमार हा यातील मास्टरमाइंड आहे. अनिलकुमार नावाने त्याने बनावट कागदपत्रे तयार करून अनेकांना गंडा घातला आहे. जळगाव पोलिसांना त्यांच्याकडे बँक खाते, केवायसी कागदपत्रे पुरावा म्हणून मिळून आला आहे. काही कागदपत्रे दिल्ली सीबीआयने पंचनामा करून ताब्यात घेतली आहेत.