जामनेर : पुणे येथील ऑर्डनन्स फॅक्टरीत नोकरी लावून देण्याचे आमिष दाखवून तालुक्यातील चौघांना १ कोटी ९६ लाख ५० हजारात गंडा घालणाऱ्या शेख हुसनोद्दीन शेख चांद (वाळकी, जि. अहमदनगर) यास न्यायाधीश सचिन हवेलीकर यांनी तीन वर्षे सक्तमजुरी व सहा हजार रुपये दंडाची शिक्षा सुनावली.
शेख हुसनोद्दीन व त्याच्या सहकाऱ्यांनी पंकज अर्जुन चौधरी (शेंदुर्णी), विनोद तुकाराम वाघ (जांभोळ), रायदास शंकर आस्कर (शेरी) व धनराज कैलास थोटे (वाकडी) यांना पुणे येथील ऑर्डनन्स फॅक्टरीत नोकरी लावून देण्याचे आमिष दाखवून खोटे व बनावट कॉल लेटर व कॉल लिस्ट तयार केली. नोकरीला लावून देण्यासाठी वेळोवेळी १ कोटी ९६ लाख ५० हजाराची रक्कम उकळली. नोकरीस न लावता व घेतलेले पैसे परत न करता व त्यांना न वटणारे धनादेश देऊन फसवणूक केल्याप्रकरणी ५ मार्च २०१८ रोजी पहूर पोलिसांनी भादंवि कलम ४६८, ४७१, ४२०, ४०६, ३४४, ५०६ व ३४ प्रमाणे गुन्हा दाखल होता.
तब्बल तीन वर्षांनी खटल्याचा निकाल लागला. सरकार पक्षाकडून १२ साक्षीदार तपासण्यात आले. औरंगाबाद गुन्हे शाखेतील सहायक दस्तऐवज परीक्षक संतोष कान्हेरे यांची साक्ष महत्त्वपूर्ण ठरली. सरकार पक्षातर्फे सहायक सरकारी वकील अनिल सारस्वत यांनी काम पाहिले. त्यांना हवालदार मोहन पाथरकर, नीलेश सोनार यांनी मदत केली.