जळगाव : भरधाव वेगाने जाणारी कार समोरुन लाकडाने भरुन येणाऱ्या ट्रॅक्टरवर आदळल्याने कारचालक संदीप अरुण सोनवणे (वय ३७) व लताबाई विजय उर्फ रामकृष्ण सपकाळे (वय ५०) या जागीच ठार झाल्या तर चालकाच्या शेजारी बसलेले लताबाई यांचे पती रामकृष्ण सदाशिव सपकाळे (वय ५०) तिघं रा.भादली, ता.जळगाव व ट्रॅक्टर चालक बापू केशव सपकाळे (वय ४५,रा.कानळदा,ता.जळगाव) हे दोन जण जखमी झाले आहेत. हा अपघात गुरुवारी सकाळी साडे सहा वाजता कानळदा रस्त्यावरील शहरातच के.सी.पार्कजवळ झाला.
सूत्रांनी दिलेल्या माहितीनुसार, भादली येथील लताबाई यांची मुलगी भोकर, ता.जळगाव येथे दिलेली आहे. मुलगी व जावई यांच्या उपचारासाठी मध्य प्रदेशातील सेंधवा येथे जाण्यासाठी लताबाई व पती रामकृष्ण सपकाळे हे दोघं जण पुतण्याची कार घेऊन गुरुवारी सकाळीच घरुन निघाले. शेजारी राहणारा संदीप सोनवणे या चालकाने त्यांनी सोबत घेतले. शहरातील के.सी.पार्क परिसरात रस्त्याचे काम सुरु असल्याने एकतर्फी वाहतूक सुरु आहे. कानळदाकडून लाकडे भरुन येत असलेले ट्रॅक्टर साईडपट्टीला लागून येत असताना भरधाव वेगाने आलेली कार या ट्रॅक्टरवर आदळली. त्यात कारचा चालकाच्या दिशेने चुराडा झाला असून चालक जागीच गतप्राण झाला.