जळगाव: गुरांसाठी चारा पाहून परतणाऱ्या मावस भावांच्या दुचाकीला डंपरची धडक बसून रोहण कैलास पाटील (१३, रा. चिंचोली, ता. जळगाव) हा मुलगा जागीच ठार झाला. तर त्याचा मावस भाऊ अक्षय संदीप इखे (२६, रा. चिंचोली, ता. जळगाव) हा तरुण जखमी झाला. हा अपघात शुक्रवार, ८ मार्च रोजी दुपारी चार वाजता लेंडी नाला पुलाच्या पुढे आसोदा रस्त्यावर झाला. अपघातानंतर चालक डंपर जागेवर सोडून पसार झाला.
तालुक्यातील चिंचोली येथील मजुरी करणारे कैलास पाटील यांचा मुलगा रोहण व त्याचा मावस भाऊ अक्षय इखे हे दोघे जण शुक्रवारी दुपारी आसोदा येथे दुचाकीने (एमएच १९, डीएफ ६५०१) गुरांसाठी चारा पाहण्यासाठी गेले होते. तेथून दोघे जण परतत असताना लेंडी नाला पुलाच्या अगोदरच समोरुन येणाऱ्या डंपरची (एमएच १५, एके ३७२३) दुचाकीला धडक बसली. त्यात अक्षय इखे हा रस्त्याच्या कडेला फेकला गेला तर रोहण हा मागच्या चाकाखाली आला. त्यामुळे तो जागीच गतप्राण झाला.अपघातानंतर नागरिकांची मोठी गर्दी झाली होती. काही जणांनी पोलिसांना माहिती दिली. त्या वेळी तालुका पोलिस घटनास्थळी पोहचले व मृतदेह शासकीय वैद्यकीय महाविद्यालय व रुग्णालयात नेण्यात आला. अपघात होताच चालक डंपर जागेवर सोडून पसार झाला. पोलिसांनी डंपर ताब्यात घेतले आहे.
एकुलता एक मुलगा गेलाकष्टकरी पाटील दाम्पत्याला एक मुलगी असून रोहण हा एकुलता एक मुलगा होता. शुक्रवारी तो गुरांसाठी चारा घेण्यासाठी गेला आणि घरी एकुलत्या एक मुलाच्या मृत्यूची वार्ताच पोहचली.
रुग्णालयात प्रचंड आक्रोशअपघात व रोहणच्या मृत्यूची माहिती मिळताच मयत मुलाच्या आई-वडिलांसह नातेवाईक, गावकऱ्यांनी रुग्णालयात धाव घेतली. त्यांनी केलेल्या प्रचंड आक्रोशामुळे सर्वांचेच मन हेलावले. मुलाच्या मृत्यूच्या धक्क्याने वडील तर स्तब्ध झाले होते.
नेहमी सोबत असणाऱ्याने साथ सोडलीरोहण हा चिंचोली येथेच शाळेमध्ये शिक्षण घेत होता. तो नेहमी त्याचा मावस भाऊ अक्षयसोबत रहायचा. कोठेही जायचे असल्यास त्याच्यासोबत तो असायचा. मात्र या १३ वर्षीय भावाने अचानक साथ सोडल्याने अक्षयलाही धक्का बसला.
आज तू येऊ नको म्हटले अन् हट्ट जिवावर बेतलाअक्षय हा आसोदा येथे जात असताना रोहणही त्याच्यासोबत जायला निघाला. त्या वेळी अक्षयने त्याला सांगितले की, आज तू येऊ नको. मात्र तो ऐकायलाच तयार नव्हता व हट्ट करून तो सोबत गेलाच. मात्र घरी परतण्यापूर्वीच काळाने त्याच्यावर झडप घातली.