६00 कामगारांबाबत निर्णय घेण्याचे आदेश

महापालिकेतील २१८ बदली व ३७५ नवीन सफाई कामगारांची पदे मंजुरीबाबत ३१ जानेवारी २0१५ च्या आत राज्य शासनाला निर्णय घेण्याचे आदेश औरंगाबाद खंडपीठाने दिले.

धुळे : महापालिकेतील २१८ बदली व ३७५ नवीन सफाई कामगारांची पदे मंजुरीबाबत ३१ जानेवारी २0१५ च्या आत राज्य शासनाला निर्णय घेण्याचे आदेश औरंगाबाद खंडपीठाने आज दिले, अशी माहिती अँड.एन.एल. चौधरी यानी दिली.

महापालिकेतील राजू शिव अंकुशे व इतर २७ बदली कामगारांनी कायम सेवेत सामावून घेण्यासाठी १५ जानेवारी २0१३ रोजी उपोषण केले होते. त्या उपोषणाला अनुसरून २१ मार्च २0१३ रोजी महापालिका आयुक्तांनी २१८ बदली कामगारांना सेवेत सामावून घेण्यासाठी २१८ पदांना मंजुरी मिळावी तसेच ३७५ नवीन सफाई कामगारांच्या पदांचा प्रस्ताव शासनाकडे सादर केला होता. परंतु शासनाने अद्यापपर्यंत या प्रस्तावावर कुठलाही निर्णय घेतलेला नव्हता. म्हणून राजू अंकुशे व इतर २७ बदली कामगारांनी अँड. नितीन चौधरी यांच्यामार्फत औरंगाबाद खंडपीठात रिट याचिका क्रमांक ५९९४/२0१४ दाखल केली होती. 

या याचिकेवर २७ रोजी मुख्य न्यायमूर्ती मोहित शहा व आर.एम. बोर्डे यांच्या खंडपीठासमोर कामकाज झाले. त्यांनी राज्यशासनाला ३१ जानेवारी २0१५ च्या आत महापालिकेने पाठविलेल्या २१८ बदली कामगारांची पदे व ३७५ नवीन सफाई कामगारांची पदे मंजुरीबाबत निर्णय घेण्याचे आदेश पारित केले. धुळे शहराचा चौफेर विस्तार वाढून लोकसंख्येतही वाढ झाली आहे. लोकसंख्येच्या तुलनेत स्टाफींग पॅटर्ननुसार सफाई कामगारांची संख्या फारच कमी व अपूर्ण आहे. संपूर्ण शहरासाठी ३५0 ते ४00 सफाई कामगारांची आवश्यकता आहे. साफसफाई पूर्ण होत नसल्याने तसेच कचरा पूर्णपणे उचलला जात नसल्याने अनेक नगरसेवक व नागरिकांच्या तक्रारी आहेत. सद्य:स्थितीत शहरातील साफसफाई व कचरा उचलण्यासाठी ठेका देऊन काम करून घेतले जात आहे.