अजिंठा लेणीच्या द्विशतक पूर्तीकडे शासनाचे दुर्लक्ष

जळगाव : जगात अत्यंत महत्त्वाच्या मानल्या गेलेल्या अजिंठा लेण्यांचा सर्वांना अभिमान व सांस्कृतिक परंपरा असलेले आपण समाज म्हणून, चित्रकार म्हणून, कलावंत म्हणून व शासन म्हणून आपण अजिंठ्याकडे अक्षम्य दुर्लक्ष केले आहे. अजिंठा लेण्यांचा आधुनिक काळात शोध लागून दोनशे वर्षे झाली.

या द्विशतक पूर्तीचा उत्सव आज कोठेही साजरा होत नसताना, याची खंत जाणवत आहे, असे मत चोपडा येथील ललित कला महाविद्यालयाचे प्राचार्य प्रा. राजू महाजन यांनी व्यक्त केले.

परिवर्तनच्या दशकपूर्ती निमित्ताने खान्देशातील चित्रकारांनी समर्पित केलेल्या शोध प्रदर्शनात रविवारी 'अजिंठ्यातील चित्रकला : इतिहास आणि वास्तव' याविषयावर प्राचार्य राजू महाजन यांचे व्याख्यान झाले. पु. ना. गाडगीळ आर्ट गॅलरीमध्ये झालेल्या या कार्यक्रमाला राज शिंगे, परिवर्तनचे अध्यक्ष शंभू पाटील, नारायण बाविस्कर, चित्रकार राजू बाविस्कर, विजय जैन, विकास मलारा, शाम कुमावत, सुशील चौधरी, निरंजन शेलार, यशवंत गरूड, नितीन सोनवणे उपस्थित होते. हे शोध प्रदर्शन २८ फेब्रुवारीपर्यंत सुरू राहणार असून, रसिकांनी लाभ घेण्याचे आवाहन आयोजकांनी केले आहे.