घुसर्डी येथील शेतकरी गोकुळ कपूरचंद परदेशी यांनी आपल्या दोन एकर क्षेत्रात केळीच्या तीन हजार खोडांची लागवड केली आहे. या सर्व केळींचा माल निघेपर्यंत साधारण एक ते दीड लाख रुपये खर्च झालेला आहे. तर केळी पिकातून संपूर्ण खर्च वजा करून त्यांना आठ लाख रुपये निव्वळ नफा मिळणार आहे. स्थानिक बाजारभावापेक्षा तब्बल २०५ रुपये जास्त भाव त्यांना मिळाला आहे.
कधी काळी संपूर्ण राज्यात नव्हे; तर देशात कजगाव व परिसरातील केळ्यांना विशेष महत्व होते. मात्र, कधी बाजारात भाव मिळाला नाही तर कधी निसर्गाने साथ दिली नाही. अनेक वेळा शासनाची उदासीन भूमिका. ही केळी लागवडीत घट होण्यास कारणीभूत ठरली. असे काळानुरूप अनेक बदल झाले. त्यामुळे कजगाव परिसरातील केळीच्या खोडांची लागवड मोठ्या प्रमाणावर कमी झाली होती. मात्र, परदेशी यांनी केलेला यशस्वी प्रयोग आता अनेक केळी उत्पादक शेतकऱ्यांसाठी आदर्श ठरत आहे. गोकुळ परदेशी यांना या केळी लागवडीसाठी कृषितज्ज्ञ राकेश थोरात यांचे मार्गदर्शन लाभले. गिरणा काठावर शेतकऱ्यांनी केळी पिकाची मोठ्या प्रमाणात लागवड सुरूच ठेवलेली आहे. मोठ्या कष्टाने केळीचा बगीचा फुलवत अनेक शेतकरी चांगले उत्पन्न घेत आहेत. यापूर्वीही वाडे, वडधे, पथराड यांसह काही गावातील शेतकऱ्यांनी आपला केळीचा माल इराण व अफगाणिस्तानला दिला आहे. बाजारपेठेतील खासगी व्यापारी केळी मालाला देत असलेल्या भावापेक्षा जादा भाव देत आहेत.
-----
प्रतिक्रिया — काही वर्षांपूर्वी कजगाव परिसरातील केळ्यांना विशेष महत्व होते. मात्र, जसजसा काळ पुढे जात राहिला तसतसे कजगावच्या केळ्यांचे महत्व कमी होत गेले. शासनासह निसर्गानेही साथ दिली नाही. त्यामुळे आम्ही नवीन प्रयोग करून थेट इराण या देशातील बाजारात केळी पाठवली आहेत. येथील स्थानिक बाजारभावापेक्षा इराणमध्ये चांगला भाव मिळाला आहे. गोकुळ कपूरचंद परदेशी, केळी बागायतदार शेतकरी, घुसर्डी, ता. भडगाव
प्रतिक्रीया — केळी लागवड वाढावी म्हणून शासनाने केळ्यांना फळाचा दर्जा द्यावा. केळ्यांना हमीभाव देऊन शेतकऱ्यांना सहकार्य करावे. त्यामुळे कजगाव व परिसरातील केळी उत्पादक शेतकऱ्यांना पुन्हा सुगीचे दिवस येतील व केळी लागवडीत मोठा बदल होईल.
राकेश थोरात, कृषितज्ज्ञ, कजगाव.