लोकमत न्यूज नेटवर्क
धरणगाव : तालुक्यातील पष्टाने येथे मामाकडे शिक्षण घेत असलेल्या रोशनी योगेश जगताप या विद्यार्थीनीचा हृदयविकाराच्या धक्क्याने अकस्मात मृत्यू झाला. सर्वांशी सतत हसमुख संवाद साधणाऱ्या रोशनीच्या निधनाने गावात शोककळा पसरली आहे.
रोशनी ही पष्टाने येथे विजय शांताराम शिंपी (मामा) यांच्याकडे रहात होती. ती धरणगावी अकरावीत शिकत होती. ती घरातून ओट्यावर आली, तशी ती पायऱ्यावर बसली. थोड्यावेळातच तिची मामी, शेजारणींनी तिला उठवण्याचा प्रयत्न केला. मात्र ती उठलीच नाही.
रोशनीच्या आईचे माहेर पष्टाने होते. तिला शिंदखेडा तालुक्यातील दाऊळ (मंदाणे) येथे दिले होते. योगेश मगनशेठ शिंपी यांची ती कन्या. पंधरा वर्षांपूर्वी मुलाला जन्म देताना तिची आई मृत्यू पावली होती तेव्हा रोशनी ३ वर्षाची होती, तेव्हापासून तिचा सांभाळ तिचा मामांनीच केला. तिला धरणगाव ग्रामीण रुग्णालय येथे आणले असता डॉ. गिरीश चौधरी यानी मृत घोषित केले. पंचनामा करून तिला तिचा गावी दाऊळ येथे नेण्यात आले आहे. तिथे तिच्यावर अंत्यसंस्कार करण्यात आले. तिच्या पश्चात वडील, एक मोठी बहिण आणि एक लहान भाऊ आहे.
तीन दिवसातील दुसरी घटना
दरम्यान, तीन दिवसांपूर्वीच मुक्ताईनगर येथे एका तरूणाचा हृदयविकाराने मृत्यू झाला होता. त्यानंतर आतमा रोशनी जगताप हिचाही हृदयविकाराने मृत्यू झाल्याने हळहळ व्यक्त होत आहे. डिसेंबरच्या पहिल्या आठवड्यात केवळ अमळनेर तालुक्यातच विशीतील तीन तरूणांचाही हृदयविकाराने मृत्यू झाला होता. मंगरूळ, अमळनेर-दाजिबानगर तसेच वाघोदे येथील हे तिघे तरूण होते.