८४ दिवसांच्या अटीमुळे अडीच लाखांवर लाभार्थींच्या दुसऱ्या डोसला ब्रेक

लोकमत न्यूज नेटवर्क

जळगाव : जिल्हाभरात लसीकरण मोहिमेला विरोधाभासाचा फटका बसत आहे. ज्यांना लस हवी आहे, त्यांना ती मिळत नसून ज्यांच्यासाठी लसीकरण सुरू आहे ते मात्र, आता लसीकरणाला पुढे येत नाहीत. शिवाय दुसऱ्या डोसमधील अंतर वाढल्याने लसीकरण केंद्रांवरील गर्दी कमी झाली असून, केंद्रे अक्षरश: ओस पडली आहेत.

लसीकरण केंद्रांवरील गर्दी कमी होण्यासाठी टास्क फोर्सने आधी ४५ वयोगटाचे लसीकरण पूर्ण करून घेण्याच्या सूचना दिल्या आहेत. मात्र, यात आगामी महिनाभरात आता केंद्रांवर गर्दी उसळण्याची शक्यता अधिक आहे. याचे कारण जिल्ह्यात मार्च, एप्रिल - मे मध्ये पहिला डोस घेणाऱ्यांची संख्या अधिक असल्याने निकषानुसार पुढील महिन्यात ते दुसऱ्या डोससाठी पात्र होणार असून, त्यामुळे त्या कालावधीत त्यांची वेगळी गर्दी वाढणार आहे. यासह १८ ते ४४ वयोगटाचे लसीकरण सुरू झाल्यानंतर या वयोगटात सर्वाधिक लोकसंख्या असून हाच वयोगट लसीकरणापासून वंचित आहे. त्यामुळे ही गर्दीही राहणार आहे.

दुपटीपेक्षा अधिक अंतर

प्रत्येक गटात पहिला व दुसरा डोस घेणाऱ्यांमध्ये निम्म्यापेक्षा अधिक अंतर आहे. शिवाय ज्येष्ठ नागरिक, ४५ वर्षांवरील नागरिकांच्या एकूण लोकसंख्येपैकी २५ टक्के लसीकरण झाले आहे. त्यामुळे उर्वरित लसीकरण पूर्ण करून घेण्याचे मोठे आव्हान जिल्हा आरोग्य यंत्रणेसमोर राहणार आहे.

निकष शिथिल करण्याची मागणी

१८ ते ४४ वयोगटाचे लसीकरण सुरू करण्याची मागणी आता जोर धरत आहे. जर केंद्रांवर गर्दीच नाही, डोस शिल्लक राहत असताना या वयोगटाच्या लसीकरणाला उशीर का? असा सूरही उमटत आहे.

जिल्ह्याची गेल्या आठवड्यापर्यंतची स्थिती

हेल्थ केअर वर्कर पहिला डोस २८२६०, दुसरा डोस १४१८४

फ्रंटलाइन वर्कर ४०११९, दुसरा डोस १४५१५

१८ ते ४४ वयोगट २०९६४, दुसरा डोस ४८४७

४५ वर्षांवरील नागरिक पहिला डोस ३ लाख ५८ हजार ६५४, दुसरा डोस १ लाख १ हजार ७६५