चाळीसगाव, जि. जळगाव : वाहन कर्जाच्या नावाखाली महाराष्ट्र बॅंकेची १ कोटी ३० लाखांत फसवणूक करण्यात आली. याप्रकरणी बँकेच्या शाखा व्यवस्थापकासह तीन जणांविरुद्ध गुन्हा दाखल करण्यात आला आहे.
कर्जदार सुशील भालचंद्र पाटील (रा.पंचवटी, नाशिक), बँकेचे तत्कालीन शाखा व्यवस्थापक अजय सिंग व प्रोसेसिंग अधिकारी मंदार चंद्रशेखर देशमुख अशी गुन्हा दाखल झालेल्यांची नावे आहेत.
याबाबत निशांत माणिकराव इलमकर यांनी दिलेल्या फिर्यादीत म्हटले आहे की, १ ऑक्टोबर २०२१ आणि १ जानेवारी २०२२ रोजी पाटील याने वाहन घेण्यासाठी बनावट कागदपत्रे बँकेत सादर केली. सिंग व देशमुख यांनी कागदपत्रांची शहनिशा न करताच एक कोटी तीस लाख रुपयाचे कर्ज मंजूर केले. बॅंकेच्या लेखापरीक्षणात हा प्रकार उघडकीस आला.
याप्रकरणी वरील तीनही जणांविरुद्ध गुन्हा दाखल करण्यात आला आहे. पुढील तपास सहा. पोलीस निरीक्षक सागर ढिकले हे करीत आहेत.