जळगाव- घरात एकटी असलेल्या २१ वर्षीय तरुणीला दोरीने बांधून दोन जणांनी चोरी करण्याचा प्रयत्न केला. ही घटना कमलानगरच्या भागात सोमवारी दुपारी २ वाजताच्या सुमारास घडली.
शुभांगी विश्वास सावंत (२१ रा. चमदगाव ता. धरणगाव, ह.मुं कमलानगर, धरणगाव) असे या तरुणीचे नाव आहे. तिने दिलेल्या फिर्यादीनूसार, सोमवारी दुपारी ती घरी एकटीच होती. त्याचवेळी तोंडाला रुमाल बांधलेले दोन अज्ञात इसम घरात घुसले. एकाने तिच्या डोक्यावर झाडू मारला आणि नाकातोंडाला रुमाल लावून तिच्या तोंडात बोळा खुपसला.
तसेच घरातील दोरीने शुभांगीचे दोन्ही हात बांधले. त्यानंतर बेडरुममध्ये जाऊन लाकडी कपाट उघडून शोधाशोध केली. पण दोघांना काही आढळून आले नाही. त्यामुळे चोरट्यांनी तिला सोनं कुठे ठेवले आहे? म्हातारी तर खूप सोनं घालते, लॉकरची चावी कुठे आहे?, अशी विचारणा केली. त्याचवेळी रस्ताने जाणाऱ्या वाहनाचा आवाज आला, तसेच शुभांगीच्या मोबाईलमध्ये सायरनसारखा आवज झाल्याने दोन्ही जण घरातून पळून गेले. याप्रकरणी धरणगाव पोलीस ठाण्यात दोन अनोळखी इसमांविरुद्ध गुन्हा दाखल करण्यात आला आहे. तसेच पुढील तपास पोलीस निरीक्षक उमेश पाटील हे करीत आहेत.