वर्तमानपत्र वाटप करणारा विजय भोंबे बनला फौजदार

जळगाव सपकाळ : कष्ट करण्याची तयारी, अभ्यासातील सातत्य आणि ध्येय साध्य करण्यासाठी अहोरात्र केलेल्या प्रयत्नांमुळे आडगाव भोंबे (ता. भोकरदन) येथील विजय भोंबे हा फौजदार झाला आहे. कष्टातून यशाला गवसणी घालणाऱ्या विजय भोंबे याचे ग्रामस्थांच्या वतीने जंगी स्वागत करून सत्कार करण्यात आला.

आडगाव भोंबे येथील अल्पभूधारक शेतकरी कुटुंबातील विजय पांडुरंग भोंबे हा दहा वर्षांपूर्वी जळगाव शहरात शिक्षणासाठी गेला. घरची परिस्थिती हालाखीची असल्याने त्याने घरोघरी पेपर वाटण्याचे काम केले. पोलीस खात्यात नोकरी करायची हे ध्येय उराशी बाळगू विजय भोंबे याने तयारी सुरू केली. विजयने जिद्द चिकाटी आणि मेहनतीने हे यश खेचून आणले. २०१७ ची पीएसआयची परीक्षा विजयने दिली. त्याच्या पूर्व परीक्षा, मुख्य परीक्षा, शारीरिक चाचणी आणि मुलाखत अशा टप्प्यावर विजयने यश मिळविले. मेहनत, जिद्द आणि अभ्यासातील सातत्य हे यशाचं गमक असल्याचे तो सांगतो. आपल्या यशाचे श्रेय आई, वडील, पत्नी, बहीण, कुटुंबातील सदस्यांसह मित्रपरिवाराला जात असल्याचेही त्याने सांगितले. फौजदारपदी निवड झाल्याबद्दल विजय भोंबे याचा आडगाव भाेंबे येथे सरपंच कौशल्याबाई भोंबे, उपसरपंच रामकृष्णा भोंबे, चेअरमन सारंगधर भोंबे, रोकडोबा महाराज संस्थानचे अध्यक्ष संतोषराव भोंबे व ग्रामस्थांनी जंगी स्वागत करून सत्कार केला.

गावात २०० वर सरकारी कर्मचारी

पाच हजार लोकसंख्या असलेल्या आडगाव भोंबे येथील २०० हून अधिक युवक शासकीय नोकरीत आहेत. येथील उत्तमराव भोंबे लेफ्टनंट कर्नल तर पाच वर्षांपूर्वी नंदकिशोर भोंबे सहायक उपायुक्त झाले आहेत. तर २७ युवक सैन्य दलात असून, एक विस्तार अधिकारी, तीन ग्रामसेवक, २० शिक्षक आहेत. तर १० जण शाखा अभियंता व इतर काही प्रशासकीय विभागात कार्यरत आहेत.

फोटो