तहसील कार्यालयाचे गेट तोडून ट्रॅक्टर पळवले

भोकरदन येथील घटना; कोतवालाच्या अंगावर ट्रॅक्टर घालण्याचा प्रयत्न

लोकमत न्यूज नेटवर्क

भोकरदन : तहसील कार्यालयाचे गेट तोडून वाळू तस्करांनी ट्रॅक्टर पळवून नेल्याची घटना बुधवारी मध्यरात्री घडली. यावेळी ट्रॅक्टर अडविणाऱ्या कोतवालाच्या अंगावर टॅक्टर घालण्याचा प्रयत्न झाला.

बुधवारी दुपारी ३ वाजण्याच्या सुमारास महसूलच्या पथकाने जवखेडा ठोंबरे शिवारातील पूर्णा नदीच्या पात्रात विनानंबरचा वाळू उपसा करणारा ट्रॅक्टर पकडला. यावेळी पंचनामा करून ट्रॅक्टर तहसील कार्यालयात उभा करण्यात आला होता. बुधवारी मध्यरात्री चालक नारायण रामराव ठोंबरे, मालक भरत नाना कोंडके, नितीन सुदाम कोंडके, नारायण कोंडके यांनी तहसील कार्यालयाच्या आवारात घुसून ट्रॅक्टर सुरू केला. यावेळी आवाज आल्याने कोतवाल प्रभू बंडू मोरे यांनी ट्रॅक्टर अडविण्याचा प्रयत्न केला. त्यामुळे वाळू तस्कारांनी मोरे यांच्या अंगावर ट्रॅक्टर घालण्याचा प्रयत्न केला. त्यानंतर तहसील कार्यालयाचे गेट तोडून ट्रॅक्टर पळवला. याप्रकरणी कोतवाल प्रभू मोरे यांच्या तक्रारीवरून चौघांविरुध्द ५ लाख ४ हजार ५०० रूपयांचा मुद्देमाल चोरून नेल्याप्रकरणी भोकरदन पोलीस ठाण्यात गुन्हा दाखल करण्यात आला आहे.

तहसील कार्यालयातील तिसरी घटना

भोकरदन तालुक्यात मोठ्या प्रमाणात अवैध वाळूचा उपसा करणारी टोळी सक्रिय आहे. ज्याची सत्ता आहे, त्याच्या मागेपुढे फिरून हे माफिया अधिकाऱ्यांवर राजकीय दडपण आणतात. त्यामुळे पोलीस व महसूल विभागाने अक्षरश: वाळू माफियांसमोर हात टेकले आहेत. तहसील कार्यालयातून वाहने पळवून नेल्याची ही पहिली घटना नाही. यापूर्वी २५ फेब्रुवारी २०२० रोजी याच कार्यालयातून जेसीबी पळविण्यात आले होते. त्यानंतर १२ नोव्हेंबर रोजी ट्रॅक्टर पळवून नेला. त्यानंतर आता बुधवारी ट्रॅक्टर पळवून नेल्याची घटना घडली. विशेष म्हणजे, आतापर्यंत एकाही आरोपीला पोलिसांनी ताब्यात घेतलेले नाही.