एक शाळा जेथे प्रत्येक विद्यार्थ्याच्या वाढदिवसाला सजतेय ताट

डावरगाव देवी शाळेत औक्षणाने साजरा होतो प्रत्येकाचा वाढदिवस

टेंभुर्णी : एकीकडे मोठ्या घरच्या लेकरांचा वाढदिवस धूमधडाक्यात साजरा होत असताना आपला वाढदिवसही कधी असा साजरा होईल का? असा विचार सहज गरीब लेकरांच्या मनात येऊन जातो. मात्र, लेकरांमधील श्रीमंत- गरीब ही दरी दूर करत शाळेतील प्रत्येक विद्यार्थ्याचा वाढदिवस मोठ्या उत्साहात साजरा करण्याचा संकल्प जाफराबाद तालुक्यातील डावरगाव देवी या शाळेने केला आहे. या शाळेत प्रत्येक विद्यार्थ्याच्या वाढदिवसाला औक्षणाचे ताट सजविले जाते.

ज्याचा वाढदिवस आहे, त्या विद्यार्थ्याला मोठ्या सन्मानाने खुर्चीवर बसविले जाते. नंतर शाळेतील वाढदिवस समितीच्या विद्यार्थिनी औक्षणाचे सजविलेले ताट घेऊन त्या विद्यार्थ्याचे औक्षण करतात. त्यानंतर त्यांना शाळेतर्फे पुष्पगुच्छ भेट देऊन सर्व विद्यार्थी ‘हॅपी बर्थडे टू यू’चा गजर करून त्या विद्यार्थ्याला भरभरून शुभेच्छा देतात. काही मित्र- मैत्रिणी आपल्या मित्राच्या वाढदिवशी खाऊचेही वाटप करतात.

केवळ विद्यार्थ्यांचेच नाही तर प्रत्येक शिक्षक- शिक्षिकेचे वाढदिवसही या शाळेत तेवढ्याच उत्साहाने साजरे केले जातात. प्रत्येक शिक्षक आपल्या वाढदिवशी विद्यार्थ्यांना शैक्षणिक साहित्य भेट म्हणून देत असतात. विद्यार्थी आणि शिक्षकांच्या या वाढदिवसातून विद्यार्थी- शिक्षक यांचे भावनिक नाते आणखी घट्ट होऊन विद्यार्थ्यांना शिक्षक म्हणजे आपल्या कुटुंबातील व्यक्तीइतके जवळचे वाटायला लागतात. यामुळे शैक्षणिक वातावरण आनंददायी राहून विद्यार्थी हसत- खेळत शिक्षणात रममाण झाल्याचे दिसून येत आहे.

‘आमच्या शाळेत वाढदिवस चिमुकल्यांचा’ हा उपक्रम सातत्याने सुरू आहे. वाढदिवसाच्या दिवशी विद्यार्थी खूप आनंदित असतात. शाळेत त्यांचा वाढदिवस इतक्या उत्साहात साजरा होतो की, घरच्या वाढदिवसाची त्यांना आठवणही येत नाही. यामुळे विद्यार्थ्यांत बहीण- भावाचे भावनिक नाते आणखी घट्ट होते. त्याचा वाढदिवस साजरा झाला आता माझा कोण करणार, हा न्यूनगंड त्यांच्या मनात राहत नाही.

-रत्ना देशमुख, शिक्षिका, डावरगाव देवी.

फोटो

डावरगाव देवी शाळेत शुक्रवारी दोन मुलींचा वाढदिवस साजरा झाला. यावेळी या मुलींचे औक्षण करताना सहकारी मैत्रीण.