पारध ते पिंपळगाव रेणुकाई रस्ता असून अडचणी, नसून खोळंबा

रस्त्याचे काम निकृष्ट दर्जाचे का ?

पारध : पारध ते पिंपळगाव रेणुकाई रस्त्याचे काम महिन्याभरापूर्वीच लाखो रुपये खर्चून पूर्ण करण्यात आले; परंतु हे निकृष्ट दर्जाचे झाल्याचा आरोप ग्रामस्थांनी केला आहे. त्यामुळे रस्ता असून अडचण, नसून खोळंबा अशी अवस्था झाली आहे. यामुळे अपघाताचे प्रमाण वाढले आहेत.

अनेक वर्षांपासून पारध ते पिंपळगाव रेणुकाई या पाच किलोमीटर रस्त्याची मोठी दुरवस्था झाली होती. या रस्त्यावर जागोजागी मोठे खड्डे पडलेले होते. खड्ड्यात रस्ता की रस्त्यात खड्डे अशी अवस्था झाली होती. या रस्त्याचे तातडीने काम करावे, अशी मागणी ग्रामस्थांसह विविध सामाजिक संघटनांनी केली होती. आमदार संतोष दानवे यांनी दखल घेऊन रस्त्याच्या कामासाठी लाखो रुपयांचा निधी खेचून आणला. रस्त्याचे कामही पूर्ण झाले; परंतु संबंधित कंत्राटदाराने गिट्टी टाकून थोडे डांबर टाकले. त्यावर बारीक गिट्टीचा थर टाकण्यात आला. मात्र, त्यानंतर डांबर टाकण्यात आले नाही. त्यामुळे रस्त्यावर खड्डे पडत आहेत. शिवाय, बारीक गिट्टीमुळे दुचाकी घसरून पडत आहे. दुसरीकडे रायघोळ नदीतून अवैध वाळू उपसा करणाऱ्या वाहनांमुळे रस्त्यावर मोठे चर पडले आहे. यामुळे नागरिक तीव्र नाराजी व्यक्त करीत आहेत.

त्या रस्त्याचे काम ग्रामस्थांनी बंद पाडले

पारध ते वालसावंगी रस्त्याचे काम सध्या सुरू आहे. मात्र, हे काम अतिशय निकृष्ट दर्जाचे होत आहे. जोपर्यंत हे काम योग्य रीतीने होत नाही, तोपर्यंत काम सुरू होऊ देणार नाही, असा पवित्रा घेत पारध येथील ग्रामस्थांनी रस्त्याचे काम बंद पाडले.

फोटो ओळी :

पारध -पिपंळगाव रेणुकाई रस्त्याच्या कामादरम्यान अवैध वाळूची वाहतूक करणाऱ्या वाहनांनी रस्त्यावर असे चर पाडून ठेवले आहे. २) पारध ते पिपंळगाव रेणुकाई रस्त्यावर अशा प्रकारे बारीक गिट्टी टाकून काम उरकण्यात आले.