पोलीस लाईफ; ना ड्युटीची वेळ, ना घराचा मेळ ?

जालना : रात्र-दिवस नागरिकांच्या सुरक्षेसाठी तैनात असलेल्या पोलिसांना ना ड्युटीची वेळ असते, ना त्यांना कुटुंबाला वेळ देता येत. सदर बाजार पोलीस ठाण्यात कार्यरत असलेल्या एका पोलिसाची ही कहाणी आहे.

ते जालना शहरातील पोलीस वसाहतीतील १२ बाय १८ च्या दोन खोल्यांमध्ये राहतात. त्यांना एक मुलगा व एक मुलगी आहे. त्यांची पत्नी गृहिणी आहे. त्यांना जेमतेम पगार आहे. त्या पगारावरच त्यांच्या कुटुंबाचा उदरनिर्वाह चालतो. मुलांना उच्च शिक्षण देण्यासाठी त्यांना घर बांधता आले नाही. पोलिसांना १२ तासांची ड्युटी असते. परंतु, दैनंदिन गुन्हे, घडलेली घटना, बंदोबस्त यामुळे त्यांना आपल्या कुटुंबाला वेळ देता येत नाही. कधी-कधी तर यावरून पती - पत्नीत भांडणेदेखील होतात. काही कारणास्त्व आम्ही सदरील पोलिसाचे नाव घेतलेले नाही.

ड्युटी किती तासाची ?

पोलिसांची ड्युटी १२ तासांची असते. परंतु, त्यांच्याकडे आलेले तपास व बंदोबस्तामुळे त्यांना तब्बल १५ ते १७ तास ड्युटी करावे लागते.

मुलांचे शिक्षण कसे ?

संबंधित पोलीस अधिकाऱ्याला दोन मुले आहेत. मुलगा सातवीच्या, तर मुलगी चौथीच्या वर्गात शिक्षण घेत आहे. मुलांना चांगले शिक्षण मिळण्यासाठी चांगल्या शाळेत पाठविले जात आहे.

कुटुंबासाठी फार कमी वेळ

सतत घडणाऱ्या घटना, गुन्ह्यांचे आलेले तपास व वेगवेगळे बंदोबस्त यामुळे कुटुंबासाठी फार कमी वेळ मिळतो.

पोलीस वसाहतीत राहावे लागते

आपल्या मुलांना चांगले शिक्षण मिळावे, यासाठी त्यांनी स्वत;चे घर खरेदी केले नाही. ते पोलीस वसाहतीत राहतात.

त्यांची ड्युटी २४ तास सुरू असल्याने घरातील सर्वच कामे पाहावी लागतात. मुलांचे शिक्षण, घरात लागणारे साहित्य ही कामे मलाच करावी लागतात. घर चालविताना मोठी कसरत करावे लागते. मुलांच्या शिक्षणासाठीच आम्ही घर बांधले नाही, असे त्यांच्या पत्नीने सांगितले आहे.