ट्रॅक्टर अंगावर गेल्याने एक जण जखमी

मठपिंपळगाव : अंबड तालुक्यातील मठपिंपळगाव येथील हनुमाननगर (बरडवस्ती) येथे अंगावर ट्रॅक्टर गेल्याने, एक जण गंभीर जखमी झाल्याची घटना सोमवारी सायंकाळी पाच वाजण्याच्या सुमारास घडली. रमेश मोकिंदा कुसळकर (वय ४०, रा.हनुमानगर, मठपिंपळगाव) असे जखमी व्यक्तीचे नाव आहे. रमेश कुसळकर हे घरासमोर ट्रॅक्टरचे काम करत होते. अचानक ट्रॅक्टर सुरू झाल्याने कुसळकर यांच्या अंगावर टायर गेले. यात ते जखमी झाले. त्यांना जालना येथील खासगी रुग्णालयात उपचारासाठी दाखल करण्यात आले होते.

जुगार अड्ड्यावर पोलिसांचा छापा

जालना : शहरातील मंगळबाजार येथील पत्राच्या शेडमध्ये सुरू असलेल्या जुगार अड्ड्यावर सदर बाजार पोलिसांनी सोमवारी छापा टाकून २,०५० रुपयांचा मुद्देमाल जप्त केला. या प्रकरणी सुभाष पवार यांच्या फिर्यादीवरून शेख रफिक शेख हसन (५५ रा.मंगळबाजार जालना), कमलकिशोर पुसाराम बंग (रा. मोदीखाना जालना) यांच्या विरुद्ध सदर बाजार पोलीस ठाण्यात गुन्हा दाखल करण्यात आला. पुढील तपास पोहेकॉ खरात करीत आहेत.

एका विरुद्ध गुन्हा दाखल

जालना : भरधाव वेगाने एका वाहनाने कारला जोराची धडक देऊन फिर्यादीच्या गाडीचे ४० हजार रुपयांचे नुकसान केल्याची घटना शहरातील हार्ड व्हीआयपी दुकानासमोर घडली. या प्रकरणी सागर आनंद सुराण यांच्या फिर्यादीवरून चौघांविरुद्ध सदर बाजार पोलीस ठाण्यात गुन्हा दाखल करण्यात आला. पुढील तपास पोहेकॉ खरात हे करीत आहे.

घरासमोर उभी केलेली दुचाकी लंपास

जालना : शहरातील बक्कलगुडा येथील घरासमोर उभी केलेली दुचाकी चोरट्यांनी चोरून नेल्याची घटना ७ फेब्रुवारी रोजी घडली. या प्रकरणी मयूर संजय खर्डेकर यांच्या फिर्यादीवरून सदर बाजार पोलीस ठाण्यात गुन्हा दाखल करण्यात आला.