स्वच्छ शहरासाठी सर्वांच्या पुढाकाराची गरज

जालना : शहर स्वच्छतेसाठी नगर परिषदेतील आवश्यक त्या उपाययोजना केल्या जात आहेत. स्वच्छतेच्या या विधायक कामात शहरातील सर्व संघटनांसह नागरिकांनी सहभाग नोंदविणे गरजेचे आहे, असे प्रतिपादन नगराध्यक्षा संगीता गोरंट्याल यांनी केले.

इनरव्हिल क्लबच्या वतीने शहरातील जवाहरबाग परिसरात स्वच्छतागृहासाठी पाणी उपलब्ध करून देण्यासाठी तेथील विहिरीची स्वच्छता करण्यात आली आहे. या उपक्रमाचे उद्घाटन आमदार कैलास गोरंट्याल, नगराध्यक्षा संगीता गोरंट्याल यांच्या हस्ते करण्यात आले. यावेळी क्लबच्या अध्यक्षा डॉ. सुजता नानावटी, सचिव उर्वशी खंडेलवाल, नेहा पाटणी, पूजा तौरावाला, अनुराधा जैन, सोना मिश्रीकोटकर, पूजा राठी, नगरसेवक संदीप नाईकवाडे, विनोद यादव, आदींची प्रमुख उपस्थिती होती.

स्वच्छ भारत सर्वेक्षणांतर्गत शहरातील प्रत्येक प्रभागात स्वच्छतेच्या कामासाठी सर्वच नगरसेवकांनी पुढाकार घेतला होता. पालिकेचे स्वच्छता निरीक्षक आणि स्वच्छता कर्मचाऱ्यांनीदेखील या कामात परिश्रम घेतले. शहरातील जनतेनेदेखील पालिकेला सातत्याने सहकार्य केल्यामुळे जालना पालिका स्वच्छ भारत सर्वेक्षणात राज्यात अग्रेसर राहिली आहे. स्वच्छतेसाठी ही चळवळ पुढेदेखील कायम ठेवून जालना शहर स्वच्छ व सुंदर करण्यासाठी जनतेच्या सहकार्याची अपेक्षा असल्याचे आमदार कैलास गोरंट्याल म्हणाले.

फोटो