लोणगाव येथे माझं गाव-सुंदर गाव अभियानास प्रारंभ

राजूर : भोकरदन तालुक्यातील लोणगाव येथे माझं गाव सुंदर गाव अभियानास शुक्रवारी सकाळी प्रारंभ करण्यात आला. यावेळी गाव परिसर स्वच्छ करण्याचा संकल्प ग्रामपंचायतीच्या वतीने करण्यात आला.

२२ जानेवारी ते २२ मार्चपर्यंत माझं गाव सुंदर गाव अभियान राबविण्यात येणार आहे. यामध्ये गावातील केरकचऱ्याची विल्हेवाट लावणे, शासकीय कार्यालयाचे सुशोभीकरण, प्लास्टिक बंदीची कडक अंमलबजावणी, वन्य प्राण्यासाठी पाणवठे तयार करणे, गावांत कायमस्वरूपी स्वच्छता मोहीम राबवणे आदी उपक्रम राबविण्यात येणार आहे. शुक्रवारी ग्रामपंचायत कार्यालयापासून स्वच्छता मोहीम हाती घेऊन शुभारंभ करण्यात आला. यावेळी विस्तार अधिकारी गजानन लहाने, ग्रामविकास अधिकारी जगन खैरे, तंटामुक्ती अध्यक्ष आप्पासाहेब साखरे, ओंकारसिंह शेखावत, ग्रामपंचायत सदस्य, अंगणवाडी कार्यकर्त्या, मदतनीस आदींची उपस्थिती होती. यावेळी ग्रामविकास अधिकारी जे.एम. खैरे यांनी गावातील मुख्य रस्त्यासह अंतर्गत केरकचरा साफ केला जाणार असून, गावातील शासकीय कार्यालयाचे सुशोभीकरण करण्यात येऊन मोहीम यशस्वी केली जाणार असल्याचे त्यांनी सांगितले.

फोटो

लोणगाव येथे माझं गाव सुंदर गाव अभियानांतर्गत स्वच्छता मोहिमेचा शुभारंभ करताना विस्तार अधिकारी गजानन लहाने, ग्रामविकास अधिकारी जे.एम. खैरे आदी.