जानकरांची परभणी मतदारसंघात आतापासून फिल्डिंग

रासपची दोन महिन्यांपूर्वीच शिर्डी येथे महत्त्वाची बैठक झाली होती. या बैठकीत रासपकडून आगामी म्हणजेच २०२४ मध्ये होणाऱ्या लोकसभा निवडणुकीत महादेव जानकर हे परभणी मतदारसंघातून निवडणूक लढवतील असे जाहीर करण्यात आले होते. त्यामुळे आतापासून जानकर यांनी परभणी मतदारसंघात येणाऱ्या परंतु जालना जिल्ह्यात असणाऱ्या घनसावंगी आणि परतूर येथे संपर्क अभियान सुरू केले आहे. मंगळवारी जानकर यांनी घनसावंगी येथे मेळावा घेऊन पदाधिकारी, कार्यकर्त्यांशी संवाद साधला.

यावेळी घनसावंगी येथे बोलताना जानकर म्हणाले की, आमच्या सरकारने अनेक कल्याणकारी योजना रावबून जनतेला दिलासा देण्याचे काम केले. परंतु हे राज्य सरकार केवळ राजकारण करत असल्याचा आरोप त्यांनी केला. मराठा समाजाला आरक्षण देण्यासाठी आमच्या सरकारने कशी कसरत केली हे मी जवळून पाहिले असल्याचे जानकर म्हणाले. यावेळी जानकर यांच्या समवेत रासपचे जालना जिल्हा प्रभारी ओमप्रकाश चितळकर यांची उपस्थिती होती.

आगामी काळात रासप हे सर्व निवडणुका या स्वबळावर लढविणार असल्याचे या पक्षाने या आधीच जाहीर केले आहे. त्यामुळे देखील जानकर हे आपल्या पदाधिकारी, कार्यकर्त्यांचे जाळे विणले असल्याचे सांगण्यात आले. घनसावंगी येथे मंंगळवारी झालेल्या मेळाव्यास चांगला प्रतिसाद मिळाल्याची माहिती प्रभारी ओमप्रकाश चितळकर यांनी दिली. आजच्या मेळाव्यास सभापती परमेश्वर वाघमोडे, अशोक लांडे आदींची उपस्थिती होती.