आगीत कार खाक

उघड्यावर मिठाईची विक्री; आरोग्य धोक्यात

मंठा : मिठाईसह खाद्यपदार्थांची उघड्यावर विक्री करू नये, असे आदेश शासन, प्रशासनाने दिलेले आहेत. परंतु, मंठा शहरातील अनेक मिठाई विक्रेते उघड्यावरील मिठाईची ग्राहकांना विक्री करीत आहेत. पॉकेटांवरही एक्स्पायरी तारीख नमूद नसल्याचे दिसून येत आहे. अन्न व औषध प्रशासनाने याकडे लक्ष देऊन कारवाई करावी, अशी मागणी होत आहे.

जखमी युवकाच्या उपचारासाठी ग्रामस्थांची मदत

माहोरा : जाफराबाद तालुक्यातील माहोरा येथील युवक शरद लहाने याचा हात मळणी यंत्रात अडकल्याने तो गंभीर जखमी झाला आहे. लहाने याच्या घरची स्थिती बिकट असल्याने ग्रामस्थांनी त्याच्या उपचारासाठी निधीचे संकलन केले. हा निधी त्याची आई सुंदरबाई लहाने, विलास लहाने यांच्याकडे सुपुर्द करण्यात आला. यावेळी युगंधर प्रतिष्ठानचे अध्यक्ष विनोद कळंबे, सचिव धनंजय मुळे, प्रदीप साकोळ, सुनील लहाने, छायाबाई देशमुख यांच्यासह ग्रामस्थांची उपस्थिती होती.

मनसे परिवहन कामगार सेनेची सदस्य नोंदणी

देऊळगावराजा : महाराष्ट्र नवनिर्माण राज्य परिवहन कामगार सेनेची सदस्य नोंदणी प्रदेशाध्यक्ष हरी माळी यांच्या सूचनेनुसार सुरू करण्यात आल्याची माहिती प्रदेश सचिव प्रदीप गायकी यांनी दिली. नोंदणीनंतर सदस्यांना प्रमाणपत्र व ओळखपत्र दिले जाणार आहे. शिवाय कामगारांच्या विविध प्रश्नांवर संघटना आवाज उठवून त्यांना न्याय मिळवून देण्यासाठी काम करणार असल्याची माहितीही प्रदीप गायकी यांनी दिली.

अवैध धंद्यांवर कारवाई करण्याची मागणी

परतूर : शहरासह ग्रामीण भागात अवैध धंदे मोठ्या प्रमाणात वाढले आहेत. गावागावात अवैध दारूविक्री होत असून, तळीरामांमुळे कायदा-सुव्यवस्थेचा प्रश्न निर्माण होत आहे. त्याशिवाय जुगार व इतर अवैध धंदेही सुरू असून, युवा पिढी व्यसनाधीन होत आहे. त्यामुळे अनकांचे संसार उद्ध्वस्त होत आहेत. प्रशासनाने अवैध धंदे चालविणाऱ्यांवर कारवाई करावी, अशी मागणी होत आहे.