कोरोनामुळे हळदी - कुंकू कार्यक्रमावरही संक्रांत

टेंभुर्णी : यावर्षी हळदी - कुंकू कार्यक्रमावरही कोरोनामुळे संक्रांत आली असून, एरवी संक्रातीनंतर महिनाभर चालणारा हळदी- कुंकू कार्यक्रम यावर्षी सुना-सुना दिसत आहे. ग्रामीण भागातील महिलाही हळदी - कुंकू कार्यक्रम मोजक्या जणींच्या उपस्थितीत उरकताना दिसत आहेत.

हळदी - कुंकू कार्यक्रम आता शेवटच्या टप्प्यात असताना टेंभुर्णीसारख्या १५ हजार लोकसंख्येच्या गावात अद्याप एकही मोठा कार्यक्रम पार पडल्याचे कुठे दिसून आले नाही. एरवी हळदी - कुंकू म्हटले की, महिलांसाठी एक पर्वणी असते. फराळपाणी, उखाणे, वाण वाटणे आदी भरगच्च कार्यक्रम महिनाभर चालत असतात. आज या गल्लीत, तर उद्या त्या गल्लीत यानिमित्ताने जणू ठिकठिकाणी महिला मेळावेच आयोजित केले जातात. त्यातच मागील काही वर्षांपासून गल्लीतील महिला एकत्र येऊन सामूहिक हळदी - कुंकू कार्यक्रम ठेवण्याची क्रेझ वाढल्याने या कार्यक्रमांंना मोठे स्वरूप आले होते. यावर्षी मात्र शहरांपासून खेड्यांपर्यंत हळदी - कुंकू कार्यक्रम थंडावल्याचे चित्र दिसून येत आहे.

येथील शिक्षक कॉलनीत दरवर्षी होणारा हळदी -कुंकू कार्यक्रमही यावेळी साध्या पद्धतीने रविवारी पार पडला. इतर महिलांना निमंत्रण न देता कॉलनीत महिलांनीच या कार्यक्रमात सहभाग नोंदविला. यावेळी कॉलनीतील शिक्षिका सुनीता खलसे यांनी सर्व महिलांना माॅ जिजाऊंंचे चरित्र भेट देऊन आगळेवेगळे वाण दिले. यावेळी पुष्पा म्हस्के, सुखदा काळे, सुनीता बुगदाने, उषा सोळंके, उषा चेके, सुनीता खलसे, संगीता सावसक्के, शोभा ढवळे, अनिता इंगळे, आशा राजुरे, जया उबरहंडे, सुभद्रा जगधने, सीमा पुराणे, शोभा उखर्डे, द्रोपदा वाघमारे, रेणुका शिंदे, शिवणकर आदिंची उपस्थिती होती.

फोटो- टेंभुर्णी येथील शिक्षक कॉलनीतील महिलांनी मोजक्याच जणींच्या उपस्थितीत हळदी - कुंकू कार्यक्रम घेतला. यावेळी सर्व महिलांना माॅ जिजाऊ चरित्राचे पुस्तक वाण म्हणून भेट देण्यात आले.