नियमांचे पालन करून गणेशोत्सव साजरा करा -जायभाये

माहोरा : सध्या कोरोनाचा प्रादुर्भाव आहे. त्यामुळे गणेश मंडळांनी नियमांचे उल्लंघन होणार नाही, याची दक्षता द्यावी. एक गाव एक गणपती उत्सव संकल्पना माहोराकरांची अतिशय उत्कृष्ट असून, माहोरा गाव आदर्श म्हणून घोषित झाले आहे, असे प्रतिपादन पोनि. रमेश जायभाये यांनी केले. माहोरा येथील ग्रामसंसद कार्यालयात शांतता समितीची बैठक गुरुवारी घेण्यात आली. याप्रसंगी ते बोलत होते.

पुढे बोलताना जायभाये म्हणाले की, माहोरासारख्या गावात एक गाव एक गणपती हा उपक्रम राबविण्यात येत आहे. याचा तालुक्यातील इतर गावांनी आदर्श घ्यावा. कोरोनामुळे गणेशोत्सवाच्या मिरवणुकीला परवानगी नाही. त्यामुळे कोणीही डीजे लावून मिरवणूक काढू नये, कोरोनाच्या पार्श्वभूमीवर असलेल्या सर्व नियमांचे पालन करावे, जे लोक नियमांचे उल्लंघन करतील, त्यांच्यावर कडक कारवाई केली जाईल, असेही जायभाये म्हणाले. याप्रसंगी शिवसेना तालुकाप्रमुख सुरेशकुमार बोरसे, डॉ. रवींद्र कासोद, उपसरपंच गजानन साळोक, सचिन तिडके, तंटामुक्ती अध्यक्ष बाळासाहेब गव्हले, समाजसेवक दादाराव गडकरी, ग्रा.पं. सदस्य सुखदेव साबळे, संदीप साळवे, लक्ष्मण वाघ, विकास जाधव, प्रकाश सोनवणे, योगेश साळवे, गणेश गायकवाड, सोईल पठाण, विजू इंगळे आदींची उपस्थिती होती.