तंबाखूमुक्त शाळा अभियानात बारसवाडा शाळा प्रथम

वडीगोद्री : राष्ट्रीय तंबाखू नियंत्रण कार्यक्रमांतर्गत तंबाखूमुक्त शाळा अभियानात अंबड तालुक्यातील बारसवाडा येथील जिल्हा परिषद शाळेने प्रथम क्रमांक पटकावला आहे, अशी माहिती सलाम मुंबई फाउंडेशनचे जिल्हा प्रतिनिधी सतीश वानखेडे व निर्माण विकास संस्थेचे विजय बनसोडे यांनी दिली.

महाराष्ट्र शासन, सलाम मुंबई फाउंडेशन, आरोग्य विभाग व शिक्षण विभाग यांच्या संयुक्त विद्यमानाने राज्यात ‘तंबाखूमुक्त शाळा’ हा उपक्रम राबवण्यात येत आहे. चालू शैक्षणिक वर्षात बारसवाडा येथील शाळेने प्रथम क्रमांक पटकावला आहे, तसेच शाळेतील विद्यार्थी रूपाली राठोड, प्रतीक्षा शेंडगे, आरती मोढेकर, करण घायाळ, कृष्णा मुळक आणि शिक्षक श्रीधर कुलकर्णी यांची बाल परिषदेसाठी तालुक्यातून निवड करण्यात आली. यासाठी केंद्रप्रमुख रमेश फटाले व मुख्याध्यापक सुभाष चाटे यांनी प्रयत्न केले. याबद्दल शालेय व्यवस्थापन समितीचे अध्यक्ष अशोक घाडगे, सुरेश नंदबन्सी, विठ्ठल वाजे, लहू गोल्हार, गटशिक्षणाधिकारी विपुल भागवत, के.प्र. रमेश फटाले, निर्माण विकास संस्थेचे विजय बनसोडे, सलाम मुंबई फाउंडेशनचे जिल्हा प्रतिनिधी सतीश वानखेडे यांनी कौतुक केले.