जगाला धक्का! नामिबियात 'एडोल्फ हिटलर' सलग पाचव्यांदा विजयी; वाद वाढताच नेत्याने घेतला मोठा निर्णय...

ओशाना भागातील ओमपुंडजा मतदारसंघाचे प्रतिनिधित्व करणारे एडोल्फ हिटलर उनोना यांच्या विजयाची चर्चा त्यांच्या लोकप्रियतेपेक्षा त्यांच्या वादग्रस्त नावामुळे अधिक होत आहे.

संपूर्ण जगाला दुसऱ्या महायुद्धात दुःख देणाऱ्या नाझी हुकूमशहा एडोल्फ हिटलरच्या नावाने एका राजकारणी व्यक्तीने आफ्रिकेतील नामिबिया देशात सलग पाचव्यांदा निवडणूक जिंकल्याने आंतरराष्ट्रीय स्तरावर खळबळ उडाली आहे. ओशाना भागातील ओमपुंडजा मतदारसंघाचे प्रतिनिधित्व करणारे एडोल्फ हिटलर उनोना यांच्या विजयाची चर्चा त्यांच्या लोकप्रियतेपेक्षा त्यांच्या वादग्रस्त नावामुळे अधिक होत आहे.

७० वर्षांनंतरही नाझी नावाची भीती 
५९ वर्षीय एडोल्फ हिटलर उनोना हे साऊथ वेस्ट आफ्रिका पीपल्स ऑर्गनायझेशन या पक्षाचे सदस्य आहेत. २०१० पासून ते आपल्या मतदारसंघातून सातत्याने निवडून येत आहेत. त्यांचे हे नाव जगातील अनेक लोकांना घाबरवणारे असले तरी, या विजयाचा नाझी विचारधारेसोबत कोणताही संबंध नसल्याचे त्यांनी स्पष्ट केले आहे.

आपल्या नावामुळे होणारा अपमान आणि प्रतिमा खराब होण्याचा धोका लक्षात घेऊन उनोना यांनी महत्त्वपूर्ण निर्णय घेतला आहे. स्थानिक वृत्तपत्रांशी बोलताना त्यांनी सांगितले की, त्यांनी आपल्या ओळखपत्रातून मधले नाव 'हिटलर' काढून टाकले आहे आणि आता ते केवळ 'एडोल्फ उनोना' म्हणून ओळखले जावे, अशी त्यांची इच्छा आहे.

"माझे नाव एडोल्फ हिटलर नाहीये, मी एडोल्फ उनोना आहे. लहानपणी मला हे एक सामान्य नाव वाटत होते. मी मोठा झाल्यावर जाणवले की या व्यक्तीने जगावर राज्य करण्याची इच्छा बाळगली होती. माझा त्या विचारधारेशी कोणताही संबंध नाही," असे त्यांनी स्पष्ट केले. नामीबिया हा १८८४ ते १९१५ या काळात जर्मन वसाहत असल्याने येथे जर्मन नावे असणे सामान्य आहे. मात्र, या नावाने एका नेत्याने सलग पाच वेळा निवडणूक जिंकणे ही एक अनोखी घटना आहे.