इस्राइलने इराणमधील अणुकेंद्रांना नष्ट करण्यासाठी सुरू केलेल्या ऑपरेशन रायझिंग लायनमुळे दोन्ही देशांमध्ये उदभवलेला संघर्ष युद्धविरामानंतर अखेर थांबला आहे. सुमारे १२ दिवस चाललेल्या या युद्धादरम्यान, दोन्ही देशांमध्ये मोठ्या प्रमाणावर जीवित आणि वित्तहानी झाली आहे. तसेच इस्राइल आणि इराणमधील संघर्ष शिगेला पोहोचला असतानाच अमेरिकेनेही या युद्धात उडी घेत इराणमधील फोर्डो या प्रमुख केंद्रासह एकून तीन अणुकेंद्रांना लक्ष्य करत हल्ला केला होता. या हल्ल्यामध्ये इराणमधील ही अणुकेंद्रं पूर्णपणे नष्ट झाली असून, आता इराण कधीच अणुबॉम्ब तयार करू शकणार नाही असा दावा, अमेरिकेचे राष्ट्राध्यक्ष डोनाल्ड ट्रम्प यांच्याकडून करण्यात येत होता. मात्र अमेरिकेने बी-२ बॉम्बर विमानांच्या मदतीने केलेल्या या हल्ल्यात इराणमधील अणुकेंद्र आणि अणुकार्यक्रमाचं फारसं नुकसान झालं नसल्याची माहिती अमेरिकेच्या एका फुटलेल्या गोपनीय अहवालातून समोर आल्याने खळबळ उडाली आहे. मात्र अमेरिकेचे राष्ट्राध्यक्ष डोनाल्ड ट्रम्प यांनी हे दावे फेटाळून लावले आहेत.
अमेरिकेच्या संरक्षण खात्याचं मुख्यालय असलेल्या पेंटागनचे मुख्य प्रवक्ते सीन पार्नेल यांनी इराणमधील कारवाईबाबत माहिती देताना सांगितले होते की, अमेरिकेने इराणच्या अणुकेंद्रांवर इनेक बॉम्ब टाकले आहेत. यादरम्यान, सुमारे १३ हजार किलो वजनाचे शक्तिशाली बॉम्बही टाकण्यात आले आहेत. या हल्ल्यामुळे इराणच्या अणुकेंद्रांना प्रचंड नुकसान झाले आहे, असा दावाही त्यांनी केला होता. मात्र अमेरिकेने केलेल्या हल्ल्यांमुळे इराणचा अणुकार्यक्रम पूर्णपणे नष्ट झालेला नाही. मात्र त्याचा वेग मंदावला आहे, असं वृत्त न्यूयॉर्क टाइम्सने एका गोपनीय अहवालाच्या हवाल्याने दिलं होतं.
मात्र अमेरिकेचे राष्ट्राध्यक्ष डोनाल्ड ट्रम्प यांनी न्यूयॉर्क टाइम्सने दिलेलं हे वृत्त फेटाळून लावलं आहे. आम्ही अमेरिकेच्या इतिहासातील सर्वात यशस्वी लष्करी हल्ला केला आहे. इराणचं अणुकेंद्र असलेला परिसर पूर्णपणे नष्ट झाला आहे, असा दावा डोनाल्ड ट्रम्प यांनी समाजमाध्यमांमधील आपल्या पोस्टमधून केला आहे.
दरम्यान, अमेरिकेने इराणवर केलेल्या हल्ल्याचं अध्ययन करत असलेल्या दोन व्यक्तींनी सांगितले की, इराणच्या संवर्धित युरेनियमच्या साठ्याला नष्ट करण्यात यश आलेलं नाही. तसेच सेंट्रिफ्युज बऱ्यापैकी सुस्थितीत आहेत. तर अमेरिकेने हल्ला करण्यापूर्वीच इराणने संवर्धित युरोनियमला तिथून हटवलं होतं, असा दावा अन्य एका व्यक्तीने केला आहे. तर व्हाईट हाऊसने इराणच्या अणुकेंद्रांवर झालेल्या हल्ल्याचा आढावा घेतला जात असल्याचं मान्य केलं. मात्र याबाबत करण्यात येत असलेले दावे मात्र व्हाईट हाऊसने फेटाळले आहेत.