इराणच्या परराष्ट्र मंत्रालयाचे प्रवक्ते इस्माईल बाघेई यांनी बुधवारी पहिल्यांदाच या गोष्टीची पुष्टी केली आहे की, गेल्या आठवड्यात झालेल्या अमेरिकेच्या हल्ल्यांमुळे देशाचे अणु प्रकल्पांचे मोठ्या प्रमाणावर नुकसान झाले आहे. 'अल जझीरा'शी बोलताना बाघेई यांनी ही माहिती दिली. मात्र, अणु-ठिकाणांना झालेल्या नुकसानीबद्दल त्यांनी सविस्तर माहिती देण्यास नकार दिला.
बाघेई यांनी कबूल केले की, रविवारी अमेरिकेच्या बी-२ बॉम्बर्सनी टाकलेल्या बंकर-बस्टर बॉम्बमुळे मोठे नुकसान झाले आहे. ते म्हणाले, आमच्या अणु-प्रकल्पांना मोठ्या प्रमाणात नुकसान पोहोचले आहे. अमेरिकेच्या सैन्याने रविवारी (२२ जून) इराणमधील तीन अणु सुविधा केंद्रांवर – नतांझ, फोर्डो आणि इस्फ़हान – ३० हजार पाउंड वजनाचे बंकर-बस्टर बॉम्ब टाकण्यासाठी आपले बी-२ स्टील्थ बॉम्बर्स वापरले होते.
ट्रम्प यांनी घेतले युद्ध थांबवण्याचे श्रेय!इराणची ही कबुली देशाच्या अणु कार्यक्रमाच्या 'विनाशा'च्या अनेक वृत्तांच्या पार्श्वभूमीवर समोर आली आहे. यापूर्वी, अमेरिकेचे राष्ट्राध्यक्ष डोनाल्ड ट्रम्प यांनी इराण आणि इस्रायलमधीलयुद्ध थांबवण्याचे श्रेय घेत त्या 'यशा'चा आनंद साजरा केला. हेगमध्ये पत्रकारांशी बोलताना त्यांनी सांगितले की, इराण-इस्रायल युद्धात अमेरिकेचा सहभाग आणि इराणच्या ठिकाणांवर बंकर-बस्टर बॉम्ब टाकण्याचा त्यांचा निर्णय यामुळेच युद्ध संपले.
ट्रम्प यांनी अमेरिकेच्या संरक्षण गुप्तचर संस्थेने दिलेल्या सुरुवातीच्या मूल्यांकनाचा अहवाल फेटाळून लावला, ज्यात म्हटले होते की, अमेरिकेच्या हल्ल्यांमुळे इराणचा अणु कार्यक्रम केवळ काही महिन्यांसाठीच मागे गेला आहे. ट्रम्प यांनी हे निष्कर्ष 'अस्पष्ट' असल्याचे म्हटले.
हेगमध्ये पत्रकारांशी बोलताना ट्रम्प यांनी सांगितले की, गुप्तचर माहिती विरोधात असूनही त्यांनी इराणच्या ठिकाणांवर हल्ल्याचे आदेश दिले होते. गुप्तचर माहिती फार स्पष्ट आणि निर्णायक नव्हती, असे ते म्हणाले. ट्रम्प यांनी विश्वास व्यक्त केला की, तेहरान आता आपल्या अणु सुविधा पुन्हा बांधण्याचा प्रयत्न करणार नाही आणि त्याऐवजी शांततेच्या दिशेने एक राजनैतिक मार्ग स्वीकारेल.