एथेंस - ऑपरेशन सिंदूरमध्येभारताविरोधातपाकिस्तानची मदत करणाऱ्या तुर्कीला धडा शिकवण्याची तयारी भारताने केली आहे. तुर्कीविरोधात भारताने ऑपरेशन सुरू झालंय का असा सवाल विचारला जात आहे. त्यामागचे कारणही तसेच आहे. भारतीय हवाई दलाचे प्रमुख अमरप्रित सिंग हे सध्या ग्रीस दौऱ्यावर गेले आहेत. ग्रीस आणि तुर्की यांच्यातील संबंध नेहमीत तणावात राहिले आहेत. त्यामुळे तुर्कीला धडा शिकवण्यासाठी भारताने ग्रीसला सैन्य सहकार्य केले पाहिजे अशी दीर्घ काळापासून मागणी होत आहे. ग्रीस पोहचताच भारतीय हवाई दलाचे प्रमुख एपी सिंग यांचे स्वागत हेलेनिक एअरफोर्सचे चीफ लेफ्टिनंट जनरल दिमोस्थेनीस ग्रिगोरियादिस यांनी केले. भारतीय हवाई दलाच्या प्रमुखाचा हा दौरा दिसायला सामान्य असला तरी त्यामागचा राजनैतिक हेतू खूपच महत्त्वाचा आहे.
भारत आणि ग्रीस यांच्यात 'इनियोचोस २३' आणि 'इनियोचोस २५' द्विपक्षीय युद्धा सराव सुरू आहे. अशाप्रकारचा अभ्यास दोन्ही देशांतील सैन्य आधीच करत आहेत. परंतु हवाई दलाचे प्रमुख एपी सिंग यांच्या दौऱ्याचे टायमिंग आणि त्यामागचा हेतू तुर्कीला चिंतेत टाकणारा आहे. तुर्की हा पाकिस्तानचा सैन्य भागीदार देश आहे. अलीकडेच भारतविरोधी आवाजांसाठी तुर्की एक प्रमुख मंच बनला आहे. ग्रीसमध्ये पोहोचल्यानंतर भारतीय हवाई दल प्रमुखांना हेलेनिक हवाई दल (HAF) संघटनेने मिशन आणि ऑपरेशनल माहिती देण्यात आली. याशिवाय ऑपरेशन्स आणि प्रशिक्षण यासारख्या क्षेत्रात दोन्ही देशांमधील द्विपक्षीय सहकार्य वाढविण्यावर चर्चा करण्यात आली आहे. ग्रीसच्या त्यांच्या भेटीदरम्यान भारतीय हवाई दल प्रमुख, HAFGS च्या प्रमुखांसह, हेलेनिक हवाई दलाच्या फायटर विंग तसेच टाटोई येथील डेकेलिया हवाई तळावरील हेलेनिक हवाई दल अकादमीला भेट देणार आहेत.
भारतीय हवाई दलाकडून काय मदत हवी?
या महिन्याच्या सुरुवातीला ग्रीस मिडिया रिपोर्टनुसार, ग्रीस हवाई दलाला त्यांचे प्रशिक्षण आणखी उत्तम बनवण्यासाठी भारताच्या ऑपरेशन सिंदूरची माहिती आणि रणनीती जाणून घ्यायची आहे. भारतीय हवाई दलाने त्यांनी पाकिस्तानात केलेले ऑपरेशन सिंदूरबाबत माहिती शेअर करावी जेणेकरून त्यांच्या हवाई दलाला आणखी अत्याधुनिक करता येईल असं ग्रीसला वाटते. तुर्की आणि ग्रीसमधील संबंध कित्येक वर्षापासून तणावपूर्ण आहेत. मग ते सायप्रस वाद असेल, एजियन सागरमध्ये नौदलाशी टक्कर असेल या दोन्ही देशातील हवाई दलातही संघर्ष सुरू असतो.
दरम्यान, ऑपरेशन सिंदूरवेळी भारतीय हवाई दलाने पाकिस्तानच्या दहशतवादी तळांवर ज्या पद्धतीने अचूक हल्ले केले ते ग्रीस एक केस स्टडी म्हणून पाहत आहे. ग्रीक हवाई दलाने या ऑपरेशनबद्दल भारताकडून धोरणात्मक माहिती आणि सामरिक डेटा मागितला आहे, विशेषतः भारताने राफेल आणि सुखोई सारख्या प्रगत प्लॅटफॉर्मचा वापर किती अचूकतेने केला याचे ग्रीस सिटी टाईम्सच्या वृत्तात कौतुक करण्यात आले. भारताने आपली रणनीती बदलली आहे आणि तुर्कीला त्याच्याच भाषेत प्रत्युत्तर देण्याचे धोरण त्याच्या नियोजनाचा एक भाग बनवून पुढची तयारी करत आहे असंही सांगण्यात येत आहे.