इराण-इस्त्रायल यांच्या युद्धात पाकिस्तान विनाकारण नाक खुपसण्याचा प्रयत्न करत आहे. सातत्याने पाकिस्तानकडूनइराणच्या समर्थनार्थ विधाने येत आहेत. त्यातच असं काय झाले ज्यामुळे पाकिस्तान पूर्णपणे बॅकफूटवर आला आहे. इस्त्रायलसोबत यु्द्धात पाकिस्तानकडून नेतन्याहू यांच्या देशावर अणूहल्ला होऊ शकतो असा दावा इराणकडून आला. मात्र इराणच्या या दाव्यामुळे पाकिस्तानची बोबडीच वळली. भारत आणि इस्त्रायल यांचे खूप चांगले संबंध आहेत हे पाकिस्तानला चांगलेच माहिती आहे. मात्र पाकिस्तान त्यांची नापाक कृत्ये सोडत नाही. इराण-इस्त्रायल युद्धातही पाकिस्तान भारताविरोधात संधी शोधण्याचा प्रयत्न करत आहे. परंतु त्याच्या या प्रयत्नाने इस्त्रायलला त्याचा शत्रू बनवले आहे.
पाकिस्तानची झाली फजिती
इराणसोबत युद्धावेळीच पाकिस्तानने इस्त्रायलवर अणूहल्ला करण्याची धमकी देण्याची बातमी फेटाळून लावली आहे. आम्ही कधीही इस्त्रायलला अणूहल्ल्याची धमकी दिली नाही असं पाकिस्तानने म्हटले. पाकिस्तानकडून हे स्पष्टीकरण सोशल मीडियावर व्हायरल होणाऱ्या इराणच्या सैन्य अधिकारी जनरल मोहसेन रेजाई यांच्या विधानावर आले. रेजाई यांनी म्हटलं होते की, जर इस्त्रायलने इराणवर अणूहल्ला केला तर पाकिस्तान इस्त्रायलवर अण्वुबॉम्ब टाकेल.
पाकिस्तानने अण्वस्त्र चाचणीवेळी त्यांच्या न्यूक्लियर बॉम्बला इस्लामिक अण्वस्त्र म्हटले होते. हे बोलून पाकिस्तान स्वत:ची इस्लामिक देशांमध्ये वजन वाढवण्याचा प्रयत्न करत होता. परंतु इस्त्रायलने पाकिस्तानच्या अणूबॉम्बची हवाच काढली. इस्त्रायल भलेही इराणवर हवाई हल्ले करत असेल परंतु पाकिस्तानी सैन्य तणावात आले आहे. इराणनंतर आपलाच नंबर असेल अशी भीती पाकिस्तानला का वाटतेय हा प्रश्न आहे. इस्त्रायलने ज्यारितीने इराणच्या अण्वस्त्र ठिकाणांना टार्गेट केले तसे पाकिस्तानला त्यांच्या न्यूक्यिलर ठिकाणांची भीती वाटते. भारताने पाकिस्तानवर जे ड्रोन हल्ले केले ते इस्त्रायली ड्रोनद्वारे केल्याचे पाकिस्तानी संसदेत सांगितले गेले.
नेतन्याहूच्या शपथेला पाकिस्तान घाबरते
इस्त्रायली पंतप्रधान नेतन्याहू यांनी खूप वर्षाआधी एक शपथ घेतली होती, इराण आणि पाकिस्तानच्या अण्वस्त्रांना उद्ध्वस्त करू. नेतन्याहू म्हणाले होते की, आमचे सर्वात मोठे मिशन आक्रमकवादी इस्लामी शासनाला अण्वस्त्रे मिळण्यापासून रोखणे हे आहे. अण्वस्त्रे दहशतवादी शासनाच्या हाती लागता कामा नये. मग ते इराण असो वा पाकिस्तान..या कट्टरपंथी देशांजवळ जर अण्वस्त्रे गेली तर याच्याशी निगडित जे काही नियम आहेत त्याचे पालन होणार नाही अशी भीती इस्त्रायलने व्यक्त केली होती. ही गोष्ट जरी जुनी असली तरी ज्यारितीने इस्त्रायलने इराणच्या अण्वस्त्रांच्या ठिकाणी हल्ला केला तसेच पाकिस्तानी अण्वस्त्रे ठिकाणे उद्ध्वस्त होऊ शकतात का हा प्रश्न आहे.