आता कोणत्या देशावर रशिया हल्ला करणार?; १० हजार सैन्य तैनातीच्या दाव्यानं युरोपमध्ये खळबळ

जर माल्डोवात त्यांच्या समर्थकांचे सरकार बनले तर ते जास्त सैनिक तैनात करण्यास परवानगी देतील अशी रशियाला अपेक्षा आहे.

चिशिनाऊ - रशिया-युक्रेन यांच्यातील युद्ध ३ वर्षापासून सुरू आहे. त्यातच रशियाचे व्लादिमीर पुतिन सरकारने ट्रासंनिस्ट्रिया भागात १० हजाराहून अधिक सैन्य तैनात करण्याचा प्लॅन केला आहे. पुतिन यांचा माल्डोवा येथे त्यांच्या समर्थकाचे सरकार बनवण्याचा प्रयत्न आहे असा दावा माल्डोवाचे पंतप्रधान डोरिन रेसियन यांनी केला आहे. माल्डोवात पुढचे सरकार बनवण्यासाठी रशिया निवडणुकीत हस्तक्षेप करत आहे असं रेसियन यांनी म्हटलं आहे. 

पुतिन माल्डोवात असं सरकार आणू इच्छितात जे सहजपणे त्यांच्या सैनिकांना तैनात करण्याची परवानगी देईल असं सांगत डोरिन रेसियन यांनी युरोपला सतर्क केले आहे. रेसियन यांनी म्हटलं की, जर पुतिन यांचा हा प्लॅन यशस्वी झाला तर युरोपमध्ये रशियाचे वर्चस्व वाढण्यास मदत होईल. रेसियन यांनी दिलेला हा इशारा युरोपातील देशांची चिंता वाढवणारा आहे. रशियाने युक्रेनवर हल्ला केल्यानंतर युरोपला सातत्याने पुतिन यांच्या हेतूवर शंका वाटत आहे ते रेसियन यांच्या दाव्याने बळावली आहे.

रशिया ऑनलाईन प्रचार, पक्ष आणि मतदारांना बेकायदेशीरपणे पैसे ट्रान्सफर करत आहे. रशियाने २०२४ मध्ये त्यांच्या या अभियानात माल्डोवा येथील घरगुती उत्पादनावर एक टक्के खर्च केला आहे. रशियाला माल्डोवा येथे त्यांच्या समर्थनाचं सरकार आणायचे आहे. त्यामुळे रशिया इथल्या स्थानिक निवडणुकीत हस्तक्षेप करत असल्याचा आरोप पंतप्रधान डोरिन रेसियन यांनी एका मुलाखतीत केला. रशियाचा प्रयत्न युक्रेनच्या सीमेजवळील ट्रांसनिस्ट्रिया भागात १० हजार सैनिक तैनात करण्याचा आहे असं त्यांनी सांगितले.

जर माल्डोवात त्यांच्या समर्थकांचे सरकार बनले तर ते जास्त सैनिक तैनात करण्यास परवानगी देतील अशी रशियाला अपेक्षा आहे. जर रशियाने १० हजार सैन्य या भागात तैनात केले तर युक्रेनच्या दक्षिण पश्चिम भागावर किती ताण वाढू शकेल याची कल्पना करू शकता असं रेसियन यांनी युरोपीय देशांना सूचित केले आहे. सध्या या भागात रशियाचे १५०० सैन्य तैनात आहेत. त्यातील बहुतांश स्थानिक सैन्य आहेत. रेसियन यांच्या या दाव्यावर रशियाने मौन बाळगले आहे. १९९२ नंतर ट्रांसनिस्ट्रिया येथे रशियन सैनिकांची संख्या मोठ्या प्रमाणात होती, जी अलीकडच्या काही वर्षात मर्यादित करण्यात आली आहे.