ब्रिटनची राजकन्या केट मिडलटन यांच्या फोटोवरून प्रचंड वाद, मागावी लागली माफी, पण का?

तिने फोटो एडिट केल्याचे मान्य केले आहे

Princess Kate Middleton: ब्रिटनची राजकुमारी केट मिडलटनने नुकताच एक फोटो शेअर केला आहे. तिच्या या फोटोमुळे राजघराण्यावर काही प्रमाणात टीका झाली, कारण हा फोटो सोशल मीडियावर चर्चेचा विषय बनला होता. केटने शेअर केलेला फोटो खरा नसून एडिट केलेला असल्याचा लोकांचा समज होता. आता या कौटुंबिक फोटोबाबत पसरलेल्या गोंधळाबद्दल केटने माफी मागितली आहे. तिने फोटो एडिट केल्याचे मान्य केले आहे. केन्सिंग्टन पॅलेसने हे चित्र प्रसिद्ध केले, ज्यामध्ये केट तिच्या तीन मुलांसह बसलेली दिसली. हा वाद इतका वाढला की गेटी, रॉयटर्स, असोसिएटेड प्रेस आणि एएफपीसह अनेक वृत्तसंस्थांना त्यांच्या प्लॅटफॉर्मवरून केटचे फोटो काढून टाकावे लागले.

प्रिन्सेस केटवर जानेवारीमध्ये पोटाची शस्त्रक्रिया झाली होती. शस्त्रक्रियेनंतरचा तिचा पहिला फोटो १० मार्च रोजी समोर आला. हा फोटो तिचा पती प्रिन्स विल्यम याने काढला होता. हा फोटो काढण्यावरून वाद सुरू झाला. तिच्या हातात एंगेजमेंट रिंग नसल्याचे बोलले गेले. केटच्या मुलीच्या कार्डिगनचा स्लीव्ह भाग नीट दिसत नव्हता, त्यामुळेच बहुतांश वृत्तसंस्थांनी त्यांच्या प्लॅटफॉर्मवरून हे चित्र काढून टाकले, असेही सांगण्यात आले. हे चित्र ब्रिटनमध्ये मदर्स डेच्या निमित्ताने प्रदर्शित करण्यात आले होते.

एडिट केलेल्या फोटोबद्दल केटने माफी मागितली

चित्रात केट मिडलटन तिच्या तीन मुलांसह प्रिन्स जॉर्ज, प्रिन्सेस शार्लोट आणि प्रिन्स लुईसह हसताना दिसली. सोशल मीडिया साइटवर तिने लिहिले, “अनेक हौशी छायाचित्रकारांप्रमाणे, मी कधीकधी एडिटींगचा प्रयोग करते. "आम्ही काल शेअर केलेल्या कौटुंबिक फोटोबद्दल कोणत्याही गोंधळाबद्दल मी दिलगीर आहे. राजघराण्याला मदर्स डे साठी औपचारिक कौटुंबिक फोटो सादर करायचा होता, म्हणून हा फोटो प्रिन्स ऑफ वेल्सने छंद म्हणून काढल्याचे पॅलेसच्या सूत्रांनी सूचित केले आहे.

केट मिडलटन कोण आहे?

केट मिडलटन ही किंग चार्ल्स आणि राजकुमारी डायना यांचा मोठा मुलगा प्रिन्स विल्यम्स यांची पत्नी आहे. दोघांनी 2011 मध्ये लग्न केले. त्यांना तीन मुले आहेत - प्रिन्स जॉर्ज, राजकुमारी शार्लोट आणि प्रिन्स लुई. केट यांच्याबाबतीत वाद होण्याची ही पहिलीच वेळ नाही. गेल्या वर्षी एका पुस्तकात असा दावा करण्यात आला होता की मिडलटनला लग्नाआधी प्रजनन चाचणी करावी लागली कारण ती कोणत्याही राजघराण्यातून आली नव्हती.