इराण आणि इस्रायलयुद्ध आता आणखी भयानक होत जाणार आहे. अमेरिकेत मोठ्या हालचाली सुरु आहेत. इस्रायल अद्याप इराणच्या अण्वस्त्रांच्या उपकरणांच्या साठ्याला धक्काही लावू शकलेला नाही. कारण ती जमिनीखाली भुयारांमध्ये ठेवण्यात आलेली आहेत. या भूमिगत कोठारांना केवळ अमेरिकेचाच बॉम्ब आणि तो वाहून नेण्याची ताकद असलेले बॉम्बर विमान लागणार आहे. अशातच गुरुवारी किंवा शुक्रवारी हा हल्ला होण्याची शक्यता वर्तविली जात आहे. इराणचे प्रमुख खामेनेईंचे सर्व लष्करी सल्लागार मारले गेले आहेत, प्रत्युत्तरात इराणने इस्रायलच्या मोसादच्या मुख्यालयावर हल्ला केला आहे. यावर आता इराणने मोठी धमकी दिली आहे.
इराणकडे जवळपास २० हजार मिसाईल आहेत.जरी आम्ही दिवसाला २०० मिसाईल डागली तरी आम्ही पुढील १०० दिवस सलग ती डागू शकतो. इस्रायल आणि अमेरिकेकडे एवढी मोठी डिफेंस सिस्टीम नाहीय की ही मिसाईल ते रोखू शकतील, असा इशारा इराणचे डिप्लोमॅटिक हाऊसचे संचालक हमीद रेझा गोलमजादेह यांनी दिला आहे. दैनिक भास्करला दिलेल्या मुलाखतीत त्यांनी ही धमकी दिली आहे.
जर या लोकांना इराणविरोधात लढण्याची इच्छा असेल तर त्यांनी त्याची किंमत मोजण्यासाठी तयार रहावे, असेही ते म्हणाले आहेत. इराण अजूनही उघड युद्ध लढू इच्छित नाही. इस्रायल आतून कमकुवत झाला आहे तो कधीही कोसळू शकतो. मुस्लिम देशांना फार काही करण्याची गरज असल्याचे मला वाटत नाही. इतक्या लवकर इराण प्रत्युत्तर देईल अशी अपेक्षा इस्रायलला नव्हती. आपले सैन्य पुन्हा तयार करण्यासाठी इराणला ३-४ आठवडे लागतील असे त्यांना वाटले होते. परंतू आम्ही पुढच्या १२ तासांतच स्वत:ला तयार केले आणि इस्रायलवर हल्ले चढविले, असेही गोलमजादेह म्हणाले.
आम्ही दोन इस्रायली लढाऊ विमाने पाडली आहेत. एक पायलट आमच्या ताब्यात आहे. कारमधून इस्रायलने ड्रोन आणले आणि आमची एअर डिफेन्स सिस्टीम उडविली. आता कमी प्रमाणावर इस्रायली ड्रोन येत आहेत, असा दावा त्यांनी केला. अमेरिकेने येमेनसोबत युद्धबंदीवर स्वाक्षरी केली. हे स्पष्ट आहे की अमेरिका येमेनमधील हुथींना काहीही करू शकत नाही. आमचे युद्ध इस्रायलविरोधात आहे, जर ते मध्ये आले तर त्यांनाही भोगावे लागेल, अशी धमकी गोलमजादेह यांनी दिली आहे.