इराण आणि इस्रायलमधील सुरु झालेला संघर्ष आता युद्धाकडे वळण्याची शक्यता निर्माण झाली आहे. इस्रायलनेइराणच्या आकाशावर ताबा मिळविल्याचा दावा केला आहे. तर इराणची मिसाईल इस्रायलवर आघात करत आहेत. अशातच अमेरिकेची हवेतच लढाऊ विमानांना इंधन देणारी २८ टँकर विमाने एकाचवेळी आखाती देशांकडे झेपावल्याने जगाची झोप उडाली आहे. एवढ्या मोठ्या प्रमाणावर ही इंधन असणारी टँकर विमाने इस्रायल-इराणच्या दिशेने पाठविण्याचे कारण काय असा सवाल उपस्थित होत आहे.
अमेरिकेने एक विमानवाहू युद्धनौका देखील मध्य पूर्वेकडे पाठविली आहे. या युद्धनौकेवर लढाऊ विमाने आहेत. परंतू, केसी १३५ आणि के सी ४६ ए या टँकरसोबत लढाऊ विमाने पाठविली की नाहीत हे मात्र समजू शकलेले नाहीय. फ्लाईट ट्रॅकिंग सॉफ्टवेअरने ही विमाने अटलांटिक महासागरावरून पूर्वेकडे जात असल्याचे दिसत आहे. हे दृष्य भयावह असले तरी इराणची मात्र भितीने गाळण उडण्याची शक्यता निर्माण झाली आहे.
या विमानांसोबत लढाऊ विमाने देखील असण्याची शक्यता आहे. कारण ही लढाऊ विमाने जेव्हा मिशनवर असतात तेव्हा ट्रान्सपोंडर बंद करून ठेवतात. यामुळे साध्या फ्लाईट ट्रॅकिंग सॉफ्टवेअरवर ती दिसत नाहीत. २८ लष्करी हवाई इंधन भरणाऱ्या टँकरची एकत्रित हालचाल असामान्य मानली जात आहे. सोमवारची रात्र इराणसाठी काळरात्र ठरण्याची शक्यता आहे. एवढ्या मोठ्या संख्येने हवाई इंधन भरणारे टँकर तैनात करण्याचे नेमके कारण कोणालाच समजू शकलेले नाही.
फ्लाइट ट्रॅकिंग सॉफ्टवेअरवर सर्व टँकर दिसल्यानंतर सोशल मीडियावरही खळबळ उडाली आहे. रिफ्युएलर पूर्वेकडे, युरोप, मध्य पूर्व आणि आशियाकडे एकाच वेळी जाताना दिसत आहेत. नॉर्वेमध्ये बहुराष्ट्रीय सराव सुरू होणार असला तरी एवढ्या मोठ्या प्रमाणावर या टँकर विमानांची गरज नाही. अमेरिका कदाचित इस्रायलच्या मदतीला ही विमाने पाठवत असल्याची चर्चाही सुरु झाली आहे. असे झाले तर अमेरिका इराणविरोधातील युद्धात उडी घेण्याची शक्यता आहे. इराणने नुकताच इस्रायलमधील अमेरिकेच्या दुतावासावरही हल्ला केला होता.